Cilido qofsh ti, revista “YOU” është për ty, dhe për të gjithë ata që duan ta jetojnë jetën me kapacitet të plotë.
—————————————————
Anyway, njëri ndër shkrimet e revistës, trajtuar në formë forumi ishte ky i mëposhtmi:

Përgjegjësia Sociale.

(revista “You”)
“Një Teori Etike Apo Ideologjike Që Një Qeveri, Organizatë Apo Individ Ka Përgjegjësi Përkundrejt Shoqërisë”.

Nuk besoj se jam gati që të vë në diskutim përgjegjësinë sociale të qeverisë sonë kështu që po përqendrohem tek argumente më të thjeshta si individi dhe organizatat.

Pavarësisht nga një koncept i përbashkët, Përgjegjësia Sociale merr trajta dhe forma të ndryshme kur flitet për një varietet subjektesh. Në një individ, Përgjegjësia Sociale përmbledh gjithë detyrimet dhe përgjegjësitë që ai ka ndaj ambientit social ku bën pjesë.

Çdo individ duhet të jetë i vetëdijshëm për veprimet apo sjelljet e tij si një impakt i drejtpërdrejtë në shoqërinë ku jeton. Çdokush prej nesh është një vidë thelbësore në mekanizmin që vë në punë tik-takun e jetës, sado i vogël dhe “i parëndësishëm” të na duket roli ynë.

Edhe nëse mungesa e asaj vide nuk vihet re për një kohë të gjatë, dikur një ingranazh do t’ia ndjejë mungesën duke sjellë një ç’rregullsi në të gjithë mekanizmin. Dhe kur flitet për vida e bulona, mbahen parasysh edhe qeset me plehra që vetëvriten duke u hedhur nga dritaret e kateve të larta; edhe simfonitë e borive të makinave që shoqërojnë çdo ditë mëngjeset tona. Flitet edhe për përrallëzën “Na ishte njëherë Edukata”.

Një vështrim më i ngeshëm dhe më i detajuar do të na ndihmonte të shihnim më qartë se shumë nga gjërat që na lëndojnë vijnë nga vetë ne. E të jesh i përgjegjshëm, do të thotë të jesh i guximshëm. Të marrësh guxim e të pranosh se shumë herë gabojmë, se një fjalë “Më fal/ni!” nuk është aq e kushtueshme sa duket, se të heshtësh në një moment nuk do të thotë se ti je humbësi i atij momenti. Ambienti që na rrethon ndikon drejtpërdrejt tek ne, prandaj të gjithë kemi përgjegjësi të ndikojmë tek ai.

Kur flitet për organizata, le të imagjinohet për një çast se ato janë të përbëra thjesht nga disa individë, kolosë e më të fuqishëm. Përgjegjësia Sociale e tyre mund të jetë e fuqishme në të dyja anët, negative dhe pozitive. Një Përgjegjësi Sociale negative mund të duhet ajo sjellje e një kompanie që vendos themelet mbi një agresivitet për fitime sa më të mëdha dhe sa më të shpejta, pa menduar për pasojat që mund të sjellin politikat e saj tek shoqëria.

Pavarësisht nga marrëdhëniet me konsumatorin, shumë shpejt do të kuptohet nga të dyja palët se pika e tyre lidhëse është thjesht një marrëdhënie e ftohtë biznesi.

Ndërsa një kompani që vendoset në një shoqëri jo si një parazit, por si një pjesë përbërëse e saj, duke krijuar një marrëdhënie besimi të ndërsjellë, mund ta vendosë veten në kategorinë e atyre që rrezatojnë një Përgjegjësi Sociale pozitive. Një kompani apo organizatë e tillë, duket qartë që është aty për të qëndruar për një kohë të gjatë e për t’u identifikuar jo thjesht si një biznes apo institucion, por si një pikë referimi dhe besimi në fushën ku ajo operon.

Kohët e fundit kemi parë shumë “Kolosë” të investojnë në fusha që kanë një ndikim thelbësor mbi atë që është qeliza kryesore e tyre, konsumatori ( edhe pse ky ndikim nuk është i drejtpërdrejtë mbi biznesin e tyre). Kemi kompani gjigante si Toyota që po investon në kërkime për pastrimin e ambientit, apo kompani të tjera që financojnë betejën kundër kancerit, ngrohjes globale, etj. Këto kompani nuk hyjnë në radhën e atyre që janë përgjegjëse për këto fenomene, por në rangun e kompanive që kanë një horizont më të hapur dhe që duan të vendosin themele të forta për të nesërmen.

Përgjegjësia Sociale është vullnetare. Ajo është virtyt i tyre që pranojnë të shkojnë përtej asaj që ligji përkufizon me Përgjegjësi Ligjore. Përgjegjësi sociale do të thotë të preferosh të jesh parandaluesi e jo kuruesi i një problemi. Dhe kjo është një vlerë që në Shqipëri duhet shpallur me germa të mëdha: “Kërkohet”

Revista “You”, Dhjetor 2007

P.s. S’arrita dot t’i bej lidhje pergjegjesise sociale me kopertinen e revistes qe me shume sesa pergjegjesive, i ngjante faqes 3 te “the Sun”.