Ky është një seksion i ri i Peshkut, ku cdo javë një prej nesh (apo jush) do të sjellë 10 këngë që për momentin i duken të përshtatshme.

Playlist nr. 1: Qetësi e rehatshme

Përballë zhurmave, rrëmujave dhe halleve të përditshme, ka momente qetësie që të japin një ndjenjë rehatie. Për mua, shpesh këto momente kanë ardhur si rezultat i këngëve të mëposhtme:

1. Iron and Wine - Boy with a Coin
Kjo këngë nga albumi “Shepherd’s Dog” i këtij grupi folku amerikan është e thjeshtë dhe komode. E vendosa këtu sepse përfaqëson denjësisht cilësinë e albumit.

2. Humus - Rreth i Mshelun (unplugged)
Albumi i regjistruar me kitara akustike i grupit prishtinas Humus, për mua, është shumë i mirë. Pa teprimet e studios, ky album paraqet muzikën e Humus në një dritë të thjeshtë. “Rreth i Mshelun” ka dhe aftësinë të përfaqësojë shumë mirë situatën e sotme social-politike në Shqipëri, ashtu sic është, e mbyllur në vetë-izolim.

3. Gary Jules - Mad World
Më vjen pak turp që këtë këngë klasike e dëgjova për herë të parë në reklamën e një video game lufte të prodhuar nga Microsoft. Kënga i dha emocion lojës, packa se vetëm për 30 sekonda. Dhe teksti i jep emocion momentit, megjithëse kënga është fare minimaliste.

4. Broken Social Scene - Lover’s Spit
Ky grup është nga Toronto, megjithëse s’i kam parë asnjëherë “live” gjatë kohës që kam qenë këtu. Por teksti i kësaj kënge është i madhërishëm, sidomos atëhere kur ndihesh i i zhgënjyer nga marrëdhëniet me të tjerët. Kontrasti mes qetësisë së muzikës dhe radikalizmit të tekstit është i ngjashëm me këngën e Lennon-it “Imagine”.

5. The National - Green Gloves
Gjatë muajit të fundit, e kam dëgjuar pothuajse cdo ditë albumin e ri “Boxer” të grupit nju-jorkez “The National”. Nuk është dhe aq i mrekullueshëm, por është i momentit. Dhe është i mrekullueshëm kur je në rrugë (në këmbë apo në makinë) natën.

6. Blla Blla Blla - Ty të pashë
Grupi shqiptaro-maqedon nga Shkupi është një nga perlat e panjohura të muzikës shqiptare. “Ty të pashë”, nga një album i tyre i viteve 90, është një këngë rock e thjeshtë dhe eksplozive. Nuk e di pse ndodhet këtu, por m’u mbush mendja t’a sillja.

7. Seu Jorge - Life on Mars
Thuhet shpesh që ata që tentojnë të këndojnë këngët e David Bowie-t zakonisht dështojnë. Seu Jorge, muzikant brazilian, është përjashtimi. Në këtë dhe disa këngë të tjera të Bowie-t, të prodhuara për filmin “Life Aquatic” nga Wes Anderson, Jorge i jep jetë të re muzikës së yllit anglez. Pjesërisht, mendoj unë, suksesi vjen nga melodiciteti krejt i vecantë i gjuhës portugeze.

8. Habib Koite - Sirata
Para 4-5 vjetësh më ra në dorë rastësisht një disk me titull “Mali to Memphis” që përfshinte muzikë nga këto dy vende të ndryshme, me qëllim krahasimin e rock-ut afrikan dhe blues-it amerikan. Disku është i mrekullueshëm, dhe kjo këngë është një prej më të mirave. Nuk e di fare cfarë thotë teksti, e nuk më duhet.

9. Marvin Gaye - What’s Going On
Po të lexosh gazetat shqiptare, apo Peshkun, apo komentet e peshqve, ose më saktë, sidomos komentet e peshqve, nuk ke sesi të mos depresionohesh nga gjendja jonë kolektive sot. Marvin Gaye, në këtë këngë klasike, përmblodhi një ndjenjë kolektive të ngjashme në Amerikën e viteve 70. Ja dhe një dolli për solidaritetin e pesimistëve!

10. Radiohead - Nude
Harroje faktin që kjo këngë ndodhet në albumin e bujshëm të një prej grupeve të mia më të preferuara. Arsyeja se pse është këtu është fjalia që hap këngën: “Don’t get any big ideas, they’re not gonna happen” (Mos ki ide të mëdha, se ato nuk do të realizohen). Seriozisht?