Gazeta Shqiptare

6 Qershor 2006

Artemida Çollaku
a.collaku@gazetashqiptare.com

Politika i bashkohet protestës kundër tarifave të larta të telefonisë celulare, e cila do të zhvillohet më 8 qershor në orën 12 të mesditës, dhe që konsiston në fikjen e aparatëve celularë për të paktën 5 minuta. Kjo iniciativë e ndërmarrë nga Koalicioni Antikorrupsion (ACAC), me qëllim protestën ndaj tarifave të larta të kompanive AMC dhe Vodafone, mesa duket ka gjetur mbështetësit e saj edhe tek vetë anëtarët e qeverisë. Pas asnjë dallim politik, ashtu si në shumë raste të tjera, politikanët kanë pranuar se tarifat e telefonisë celulare në vendin tonë janë shumë herë më të larta dhe ndaj një situate të tillë duhet reaguar. Një pjesë e tyre e ka cilësuar këtë fenomen një të padrejtë që u bëhet qytetarëve shqiptarë. Gjatë prononcimeve të dhënë në Neës 24, politikanët shprehin besimin e tyre se nisja e hetimeve të komisionit hetimor parlamentar Ceka është një hap i hedhur drejt zgjidhjes së kësaj situate aspak normale për të gjithë shqiptarët. “Nëse ky do të jetë vendimi i shumicës së popullit, unë do t’i bashkohem kësaj proteste dhe do ta fik celularin tim”, u shpreh ministrja e Integrimit, Arenca Trashani. Duke i cilësuar “tarifa të çmendura”, kreu i komisionit të Jashtëm Parlamentar, Preç Zogaj shprehet se kjo “protestë do të luajë një rol sensibilizues për të reaguar ndaj këtij fenomeni”, por ai nënvizon se “duhet shkuar edhe me tej dhe një gjë e tillë shpresojmë që ta bëjë komisioni hetimor i ngritur për këtë çështje”. Ndërsa Neritan Ceka, kreu i komisionit hetimor parlamentar, që po heton për këtë problem, shprehet se kjo protestë duhet të vazhdojë deri në zgjidhjen e problemit të tarifave celulare. Po kaq të gatshëm për të qenë pjesë e protestës kundër tarifave të larta celulare janë treguar edhe përfaqësuesit e opozitës.

Ruli dhe Basha
Dy ministrat e linjës që përgjigjen për shërbimin e telefonisë celulare dhe asaj fikse, ministri i Transporteve dhe telekomunikacionit, Lulëzim Basha si dhe ministri i Ekonomisë Genc Ruli, shprehen disi të rezervuar për t’iu bashkangjitur kësaj proteste nisur nga pozicioni që kanë. Ministri Genc Ruli deklaroi se “inisiativa të tilla ndërmerren nga përfaqësues të shoqërisë civile dhe janë për t’u përshëndetur, por qeveria ka të tjera mekanizma dhe mënyra se si vepron”. Megjithatë ministri Ruli nuk bëri të ditur asnjë nga masat që duhet të marrë qeveria në një situatë tillë, ndërkohë që priten rezultatet e komisionit hetimor parlamentar. Iniciativa është përshendetur edhe nga ministri Lulëzim Basha, i cili për shkak të pozicionit të tij nuk ka dashur të prononcohet, por shprehet se “se inisiativa të tilla i kanë munguar vendit dhe janë të mirëpritura kurdoherë”. Kreu i partisë Demokracia Sociale, Paskal Milo, shprehet se i bashkohet kësaj iniciative dhe se shpreson që “do të ketë efektet e duhura për të bërë rregullimet e duhura”. Ndërkohë ai nënvizon se politika e ka ndërmarrë tashmë hapin e saj me krijimin e komisionit hetimor.

Protesta
Koalicioni Antikorrupsion i bën thirrje të gjithë qytetarëve që t’i bashkohen protestës së tyre kundër tarifave të larta të telefonisë celulare. Nën moton “celulari dëmton xhepin”, koalicioni bën thirrje që të gjithë qytetarët shqiptarë të fikin celularët e tyre më 8 qershor, në orën 12 të mesditës për të paktën 5 minuta. Kjo protestë ka si qëllim kundërshtimin e tarifave të larta të telefonisë celulare, të cilat në vendin tonë janë shumë herë më të larta se tarifat që aplikon kjo telefoni në vendet fqinjë me ne.