Peshku pa uje » Flamuj, Parrulla, dhe Gënjeshtra e madhe

Flamuj, Parrulla, dhe Gënjeshtra e madhe

4 Prill 2008 @ 5:23 pm · në Politike, Opinion · postuar nga Blendi Salaj

Ftesa e vendit në NATO është një hap në drejtimin e duhur për tu përshëndetur dhe ndier të nderuar. Megjithatënë këtë shkrim nuk do të merrem me këtë ndodhi por me “reagimin publik” ndaj fteses. Apo më saktë manipulimin e imazheve publike nga Sistemi me festa e koncerte, duke parë që në disa raste të spikatura artificialiteti i reagimit është pasqyrim i ndërgjegjes që po na bren së brendshmi. “Gëzimi i madh” që na pushtoi nga Ftesa për në NATO më tepër se konceptim i asaj që dmth. kjo ftesë është shprehje e bindjes që i imponojmë vetes se kjo Demokraci është prej vërteti.

Shikoj fotografitë që qarkulluan në shtyp, ku disa vetura dhe ca 4×4 vijne vërdallë bulevardit duke valëvitur flamuj kuqezi dhe flamuj të NATO-s. Dhe them me vete, “Ku i gjetën këta flamujt e NATO-s? Sa shqiptarë njihni ju që mban në shtëpi një flamur të Aleancës së Atlantikut të Veriut? Për besë unë nuk njoh askënd të tillë. Pastaj, si do të ndryshojë jeta e shqiptarit të zakonshëm pas ftesës që ta frymëzojë të dalë të valvisë flamuj? Unë e kuptoj që Ftesa është një arritje, por është akoma tepër abstrakte dhe e paprekshme që të frymëzojë gëzim spontan, ashtu siç psh. reaguan në të njëjtën ditë me valle në rrugë në Kosovë kur Ramushi u shpall i pafajshëm. Ka ndodhur një tragjedi e rëndë në Shqipëri muajin që shkoi ku të paktën 26 vetë humbën jetën. Zija e Gërdecit ende nuk ka kaluar, gjërat duhen parë në këtë kontekst përpara se ata që nuk po tregojnë entuziazëm të spikatur ndaj ftesës të sulmohen me fjalë boshe. Është në kontekstin e asaj që ndodhinë Gërdec, që e gjej këtë “festë spontane” të pasinqertë, të stisur e për rrjedhojë patetike.

Ndjenja e pakënaqësisë që po kaplon apo ka kapluar plotësisht pjesën më të madhe të shoqërisë shqiptare nuk është pa shkak dhe nuk është e drejtuar kuturu, ajo i detyrohet dhe i drejtohet Sistemit në të cilin shoqëria shqiptare është e nënshtruar të jetojë. Kjo “Demokracia” jonë është një sistem imazhi, diçka që egziston vetëm në lajthitjet e demagogëve dhe mendjeshkurtërve. Njësoj si në diktaturën e Enver Hoxhës ky sistem ka nevojë për parrullat e banderolat e veta. Sistemi post-diktatorial në Shqipëri edhe pse quhet Demokraci e votës së popullit, popullin e skllavëron, premton ndryshim dhe ndryshon për keq, premton liri individuale por individualizmi azgjesohet, rrënimi kulturor quhet zhvillim, manipulimi i fakteve shitet për informim publik, propaganda për frymëzim, korrupsioni vishet si zbatim i ligjit, farsat mediatike prezantohen si Liri e shtypit, pasurimi ekonomik mbi djersën e popullit sa i njërit apo tjetrit klan trukohet me brroçkulla për integrim. Me manovrat e Dushkut edhe Sistemi i votës është një gënjeshtër më shumë. Ky nuk është sistem i shumicës por sistemi i pakicës që ka nënshtruar dhe droguar shumicën. I gjithë Sistemi, Pozitë dhe Opozitë është i tillë, i rremë dhe i kurdisur. Një gënjeshtër që e zbulojmë për të tillë nga pak përditë por që nuk kemi forcën dhe guximin ta ekspozojmë, sepse po ta kundërshtonim do të na duhet t’i pranojmë dhe vetes se jetojmë në një shoqëri të rreme fund e krye. Ku as liria, as jeta as e ardhmja nuk janë tjetër veçse sllogane e flamuj të panjohur. Dhe të gjithë ne që i dimë të gjitha këto dhe vazhdojmë të bëjmë të urtin brenda kësaj ngrehine të turpshme nuk jemi tjetër vetëm se pjesë përbërëse e Sistemit, që e kemi trankuilizuar ndërgjegjen e që gënjeshtrën jo vetëm e pranojmë por pranojmë ta jetojmë. Me pak fjalë, kjo është “Gënjeshtra e madhe”, ku një grup i paskrupuj mbeturinash të Sistemit të kaluar kanë ndërtuar Sistemin e tyre parazitar, gjoja demokratik.

Po kush janë këta që festojnë NATO-n me flamuj që mesiguri ua kanë dhënë shefat? Unë dalloj një Touareg të zi, di që Touaregët janë makina zyrtarësh. Kot po zgjatem, dyshoj se janë shofera ministrash apo deputetësh. Punojnë për shtetin pra, për Sistemin. Nuk besoj për asnjë moment që i kanë zënë ethet e gëzimit të Fteses për në NATO në këtë farë feje sa kanë dalë me makina në bulevard. Ata thjesht po bëjnë atë që i kanë udhëzuar të bëjnë. Nuk i kanë detyruar por shoferat kanë pranuar. Kanë pranuar jo se besojnë se jeta e tyre vërtetë do të bëhet më e jetueshme tani pas Ftesës, por sepse jeta e tyre është më e jetueshme kur u binden urdhrave të shefave dhe nuk krijojnë probleme. Sepse nëse ndonjëri nga shoferët do tregohej i sinqertë që nuk ia ndjente aq sa të dilte xhiro në bulevard, mund të shihej si shenjë rebelimi, e ndoshta mungesë besnikërie ndaj shefit, deputetit, apo klanit nepotik që e ka punësuar.

Megjithëse e pasinqertë xhiroja e makinave në bulevard e ka një kuptim të rëndësishëm. Në vetëvete dalja me flamurin e NATO-s në shesh për këta nuk është shprehje e gëzimit por shprehje e nënshtrimit të tyre - dhe tonit - ndaj Sistemit. Është ilustrim i kapitullimit të individit në një sistem imazhesh, ku ajo çka mendon dhe ndjen vërtetë nuk ka rëndësi aq sa detyra ndaj Sistemit për të luajtur rolin e figurantit në kët teatër-jetë. Ata kanë dalë për imazh, si sllogane, ku slloganet janë ata vetë. Në vend të flamujve mund edhe të kishin vendosur tabela që thonin: “Unë i bindem Sistemit” - vetëm se kjo do t’ua lëndonte krenarinë personale. Dhe do të ekspozonte sesa e rrejshme është natyra e Demorkacisë Shqiptare. Të gjithë ne, që i kuptojmë këto dhe heshtim, bëjmë kështu për të njëjtën arsye. Do ishte më e ndershme për sejcilin prej nesh ta pranonim që jetojmë një rrenë në një vend ku Sistemi post-diktatorial na shpërfytyron. Por kjo e vërtetë është tepër e dhimshme në nivel personal. Ndaj bëjmë sikur besojmë që ndoshta një parti e re, në zgjedhjet që vijnë, në kohën e ardhshme….një Mesia do të vijë të na shpëtojë!!!

Pranimi i kësaj strukture gënjeshtrash përbën nënshtrimin tonë shoqëror, dhe zelli për të mbështetur Partinë A kundra Partisë B me dijeninë e plotë që si A ashtu edhe B janë i njëjti produkt post-diktatorial - ky zell për tu bërë pjesë e lojës është në vetvete shprehje e patetizmit tonë të përbashkët. Sepse të gjithë e pranojmë se nuk i besojmë më këta politikanë, e megjithatë i lejojmë të na nëpërkëmbin. Cilido kah politik të ishte në pushtet dilema e shoferit te Touaregut mbetet e njejte. Nuk eshte PD-ja që i detyron atij të festojë me flamur të NATO-s, të njëjtën gjë do të bënte edhe nëse shefat do t’i kishte të majtë. Por çdo të ndodhte në rast se shoferi i Touaregut do të refuzonte të bënte xhiron e bulevardit për nder të NATO-s? Në rast se ai do kishte guximin dhe forcën që të vepronte si individ dhe jo si individ i nënshtruar a do të gjente çlirim në të vërtetën? Ndoshta jo po të bënte kështu i vetëm, ndoshta i vetëm në kundërshtim të direktivës thjesht do përjashtohej nga puna, sepse Sistemi nuk mund të lejojë që një shofer të ekspozojë natyrën e tij të gënjeshtërt.

Por në rast se secili prej nesh e gjen kurajon të mos jetojë më në gënjeshtrën dhe të mbajë një qëndrim parimor për të vërtetën gjërat do të ndryshonin shumë shpejt. Vetëm ata individë që refuzojnë të bëhen pjesë e kësaj gënjeshtre më gjatë, vetëm ata për të cilët e verteta ka më tepër rëndësi sesa qetësia personale do të gjejnë guximin të jetojnë dhe flasin si individë të lirë. E paçka se mund të duket marrëzi, e vetmja disidencë reale është ajo që bëhet për të jetuar të Vërtetën. Dhe e vërteta është e hidhur për sa i ka ndodhur këtij vendit tonë këta 18 vjet të tranzicionit, në dhëmbët e cilëve hijenave ka përfunduar Shqipëria dhe cilët psikopatë e injorantë bëjnë ligjin këtu. E vërteta është e tmerrshme kur shikon se Sistemi post-diktatorial është transformim i diktaturës politike në diktaturë ekonomike, kur shteti është i kapur deri në majë sa nga oportunistët aq dhe nga të paaftit.

E vërteta është që në Shqipëri komandojnë të fortët dhe heshtin të mençurit, gëlojnë militantët, vuajnë individëd, korruptohen të rinjtë, kurvërohen të vjetrit. E Vërteta është që jemi të papërfaqsuar politikisht, jo realisht. E Vërteta është që jemi sovrarnë vetëm në fletët e Kushtetutës, por jo në zbatim. Jemi të pambrojtur nga vetë shteti ynë, Mafia është në shtrat me Qeverinë. Krimi përdhunon rregullisht të drejtën në gjykatat. E vërteta është se Shqipëria është kthyer në vend pazaresh e prapaskenash, kontrabande dhe trafiqesh, ku asgjë nuk është ashtu siç duket. E vërteta është që në Shqipëri i varfri është shpesh skllav dhe i pasuri është akoma më shpesh kriminel. E vërteta është që i gjithë vendi po kthehet ngadalë në një Gërdec të madh eksploziv, ku shteti të vret natën dhe të dëmshpërblen (me paratë e tua) ditën. Shqipëria është një vend ku besimi ka humbur e ku udhëheqësit nuk të frymëzojnë por ta pështirosin.

Por ne edhe pse i dimë të gjitha këto heshtim dhe shpallim se nuk kemi ç’të bëjmë, shfajsohemi dhe i vëmë një gur ndërgjegjes për ta zhytur në fund. Kështu ne gënjejmë veten ashtu siç kemi bërë deri tani, dhe shiko ku na solli. Dhe në heshtjen tonë bëhemi vegla të bindura, që sistemin e gënjeshtrave jo vetëm që nuk e kundërshtojmë por me bindjen e mbështesim. Hapi i parë drejt Alternativës Disidente ndaj kësaj kleptopolitike barbare që po na mbyt është mohimi i Gënjeshtrës dhe pranimi i së Vërtetës. Vetëm kur të gjejmë guximin të jetojmë në të Vërtetën do të arrijmë ta ndalim këtë turp, e për të arritur deri aty më parë duhet të lëmë ndërgjegjen të flasë pa frikë. Sistemi do të na etiketojë si anarkistë apo të çmendur, por ne e dimë tashmë sesi Sistemi gënjeshtrat me gënjeshtra i mbulon.

Blendi Salaj
peshkupauje.com

Fotot: Arben Celi / REUTERS

181 Komente »

Liri thotë:

4 Prill 2008 @ 5:49 pm

E perkryer Blendi.

Asterion thotë:

4 Prill 2008 @ 5:49 pm

Blendi, i ke rënë kokës. Pikërisht në momente gëzimi të tillë të orkestruar shfaqet gjithë hipokrizia dhe shëmtia e një sistemi, i cili nuk po i beson dot më as vetvetes, pa e parë në pasqyrë.

Parrulla Armiqesore thotë:

4 Prill 2008 @ 5:51 pm

me lexove mendjen dhe e shkrove kete? … keshtu te mprehur te pafsha gjithmone.

edrus thotë:

4 Prill 2008 @ 6:12 pm

Blendi, do shkoj të blej një kapele… ta kem, se ndoshta takohemi dhe duhet të ta bëj tamam respektin.

Qafir Arnaut thotë:

4 Prill 2008 @ 6:19 pm

Sic e tha XhaXhai sot, hyrja ne NATO mund te perftoje nje kaste ushtarake te forte qe t’ja u shtypi koken ‘politckove’ te Tajrones.

le te shpresojme…

peshkaqeni thotë:

4 Prill 2008 @ 6:22 pm

Blendi unë them që ta nisim me xhaxhin Ramiz.

Pa hequr qafe atë kriminel nuk kemi gjë në vijë.
Pastaj ti heqim qafe me radhë të gjithë këlyshët e tij.
Pa pastruar vendin nga këta mij nuk ka për të pasur kurrë demokraci në shqipërinë tonë të dashur.
Shembull më të mirë se rumunët nuk kemi për të pasur kurrë.

shefi kuadrit thotë:

4 Prill 2008 @ 6:23 pm

Shume mire Blendi te pergezoj. Zakonisht hapesh shume ne shtjellim por kete rradhe je konciz dhe konkret.
Eshte ne traditen tone prej ciraku qe te perulemi der ne toke ne hosanarat qe i bejme pakursim kujtdo qe na begeneis. Enveri i bente me bollek keto hosanara, atehere ishin pak me te hajrit se beheshin nga ndermarrja Mihal Duri me duket, sot Mihal Duri eshte zevendesuar nga yryshet e Kavajes dhe Bathores qe dikur dilnin me Ifa, sot e kane rrit pjacen ne VW, por e kane ulur nivelin ne krahasim me dikur.
Eshte kompleksi i vocerrakut qe ndihet i panginjur dhe i dobet dhe brohoret si i marre per kedo qe ja var ca. Sikur ta meritonim NATO-n me te vertete nepermjet krijimit te nje shteti normal me institucione te themelta, me drejtesine si princip qeverises, me kushtet elementare te jeteses te arritura atehere nuk do te gezoheshim aq shume per kete anetaresim pasi do ta konsideronim si nje hap normal per nje popull progresiv. Gezimi tejmase na vjen pasi na duket sikur ja hudhem edhe kete here me ata marifetet tona prej dallaveraxhinjsh, gezohemi si ai nxenesi ngels qe merr dhjete ne provim duke kopjuar.
Arma me e forte qe kemi ne dore eshte vota. Le ta perdorim me me kursim heren tjeter.

lulian kodra thotë:

4 Prill 2008 @ 6:24 pm

Hej Blendi. Fjale e kulluar e nje mendimi te kulluar. E vetmja gje qe mbetet tani, eshte veprimi i kulluar.

shefi kuadrit thotë:

4 Prill 2008 @ 6:28 pm

E shifni ate kaushin qe puth flamurin e Nato-s mbi makine?
Dikur baba vet i eshte perulur ter respekt bustit te Stalinit.
Po dinjitetit tone kur do ti perulemi?

Aiglon thotë:

4 Prill 2008 @ 6:30 pm

Blendi, shume artikull i drejte. Por akoma me trishtueshme eshte fakti qe dhe ti, as une, as ndonje peshk tjeter nuk jemi ne gjendje te propozojme nje zgjidhje ose nje alternative ndaj ketij realiteti. C`ti thoshte vellai im komshiut tone ne Tirane kur ky i fundit ju pergjigj fteses per te manifestuar duke thene : c`me duhet ajo pune mor cun, te me heqin nga puna pastaj. Kush do i jape buke ciliminjve pastaj ???

Besoj qe e njejta frike mbizotronte popullaten shqiptare ne manifestimet e 1990. Frike nga administrata per pushime masive, frike nga kercenime, frike per burgim etj etj. Kjo ishte arsyeja kryesore pse ne ndryshim nga Polonia (kujto punetoret e uzines Gdansk dhe sindikalistet Solidarnos), ne Shqiperi ishin studentet ata qe ju kundervune te paret sistemit komunist. As Hajdari, as Rama, as Imami, asnjeri prej tyre nuk ishin disidente por thjeshte studente idealiste te cilet paten kurajon civile te ngrinin zerin ndaj diktatures komuniste. Po sot ?

Sot, gjendja eshte krejt tjeter. Fatkeqesisht, rinia shqiptare eshte e perfaqesuar nga njera ane nga individe si ai shoferi i Tuaregut te cilet kane ca pseudo diploma, pjelle e filanit fisekut, te perkedhelur nga mireqenia korruptive dhe degjeneruese e shefit dhe nga ana tjeter nga nje rini ne depresion klinik qe te vetmen te ardhme e sheh si emigrant murator jashte shtetit - cdo dite lexoj nga nje artikull per ndonje te ri te vetvare (Lexo TCH : gjendet e vetvrare ne kasolle 20 vjecarja)

Sot, nuk mund te presim te njejten levizje studentore ose popullore si me 90en kundra kesaj qeverisjeje te degjeneruar.

Une jam idealist. E them me plot bindje. Ndryshimi do te vi vetem nga ata te rinj shqiptare te formuar jashte shtetit qe jane rritur me vuajtjen e varferise dhe kane formuar idealin e se drejtes, te ndershmerise e te meritokracise. Blendi, o peshq, kur keni ndermend te ktheheni se ndyshe nuk behet ai vend?

toko thotë:

4 Prill 2008 @ 6:30 pm

Bravo Blendi Shume bukur .
Peshkatare mos haroni Gerdecin

lumidrin thotë:

4 Prill 2008 @ 6:51 pm

Hyrja ne NATO nuk eshte genjesher,por realitet.
Politika Shqiptare eshte genjeshter,kete e dine te gjithe Shqiptaret me perjashtim te “politikaneve” tane.
Genjeshter eshte edhe ajo (me e rrezikshme) kur genjen veten,nga qe nuk don te jesh i vertet.

Tironsi thotë:

4 Prill 2008 @ 6:51 pm

Shkrim shume deshperus. S’ta pata borxh kete Blendo. Jo per week-end te pakten

lefti thotë:

4 Prill 2008 @ 6:52 pm

Kur eshte per te vajtuar, duhet bajtuar, kur eshte per te gezuar, duhet gezuar !

Gerdeci ka bash tre jave qe ka ndodhur, dhe kemi gati kaq dite qe po e vajtojme dhe po flasim per te. Dje ishte evenimenti i Natos, mire bejme te na lene te qete, te festojme, sepse dite te bukura nuk kemi shume.

Njerezit kane nevoje per data historike fatlume, sepse pjesa me e madhe e tyre jane fatkeqe (si edhe Gerdeci) - Hyrja e Shqiperise ne Nato, marrja e fteses dhe ulja e krereve Shqiptare ne nje tavoline me Kreret e vendeve te Natos, ben qe kjo dite te jete e shenuar per ne te gjithe.

Nuk them se shkrimi ishte i keq, apo i gabuar, por verej se autori mundohet te kritikoj edhe ne vete “metoden e gezimit”, te shprehur nga njerez ne forma te ndryshme.

Nese juve ju kane bere pershtypje ata flamuj nga “disa” makina ne Tirane, mua me ka bere me teper pershtypje mallengjimi i njerezve te aferm te mi, kur ndiqnin ceremonine e pranimit te Shqiperise ne Nato.

Secili ka metoden e vet te te shprehurit te gezimit : Shqiptaret jane ndoshta me ekspresiv : por, a eshte ky nje faj ?

Kam pare se disa e çojne lidhjen edhe me 1 Majin e Enverit, apo edhe me paradat apo makinacionet e regjimit Diktatorial … Edhe ne kete dite te shenuar per te gjithe Shqiptaret, do gjeni prapavije “politike” ?

Mesa pashe une, s’kishte ne rruge flamuj te PD-se, apo portrete te Berishes : vetem flamuj Shqiptare dhe te Aleances kishte. Pra, mos u mundoni te kritikoni menyren e “orkestruar” te shprehjes se gezimit te njerezve, per te gjetur perfitimie politke.

Nese do te ishte keshtu, atehre shembulli me i mire qe mund te merrni ju eshte “Protesta/Mitingu, Marshimi … s’ja dime emrin” qe po ben Opozita sot, me fjamujt e saj dhe me parrullat e saja. Nga njera ane “opozitaret” hiqen sikur festojne Hyrjen ne Nato, edhe pse endrerrojne qe kjo gje te behej kur ata te ishin ne pushtet (s’kane fat ! Biles Rama paska premtuar, se ne 2009 Shqiperia do te behet anetare me te drejta te Plota, nen pushtetin e PS - qe tregon se edhe ai ka zili nga kjo pune …), KURSE nga ana tjeter, “Protestojne” per largimin e Berishes !

Normale do ishte qe t’i ndanin gjerat, per mos te krijuar konfuzione te kota : oise te festonin sot per Naton, dhe te kerkonin neser doreheqjen e Berishes, ose te benin te kunderten, por jo te dyja bashke … sepse i bie qe te jene keta pastaj, qe duan te “hedhin balte” mbi integrimin e Shqiperise ne Nato.

J. thotë:

4 Prill 2008 @ 6:54 pm

Sistemi do të na etiketojë si anarkistë apo të çmendur, por ne e dimë tashmë sesi Sistemi gënjeshtrat me gënjeshtra i mbulon.

Te jesh anarkist ketu eshte nder, detyre, sinqeritet.

ardi thotë:

4 Prill 2008 @ 6:55 pm

…Blendi, ke shume te drejte,…
…por edhe njefare ambienti duhet te krijohet…me hir apo pahir….sigurisht qe ata festuesit jane me pagese….
….meqenese nuk eshte gje e vogel….shteti duhet ti tregoje popullit indiferent, apo jo te interesuar qe hyrja ne NAto eshte e rendesishme….

Grupi thotë:

4 Prill 2008 @ 6:58 pm

Alternativa eshte problemi…se kshu me llafe te gjithe pajtohemi. Po c’do behet mbas llafeve? S’me duket se alternativa MJAFT-iste apo G99-iste eshte terheqse…per mua.

Nuk me duket se ne Shqiperi kemi nevoje per me teper “idealist”…por pe me teper “realist”. Realiteti eshte qe ndryshimet vine nga brenda partive ekzistuese…ose me nje levizje politike te re (qe nuk perfshin levizjet e tipit MJAFT). Se pari kjo levizje duhet kryer ne PD…se ajo eshte me e semura me ish-komunista te deformuar…pa permendur fare kultin e individid dhe kultin e klanit qe ka themeluar Sali Berisha dhe qe eshte pengesa numer 1 per nje te “djathte” te sinqerte. PS-ja ka marr hapa te duhura ne ate drejtim tashme…dhe te pakten duhet mbeshtetur ne vazhdim te ati spastrimi dhe reformimi.

Per mua zgjidhja eshte krijimi i nje sistemi meritokracie…pertej te majtes dhe te djathtes… (po ja vjedh fjalet Edvin Rames) Kjo do lejonte forcimin e institucioneve…qe per mendimin tim eshte pengesa numer 1 ne Shqiperi…jo vetem partite politike. Ne kemi nje sistem instituional qe cdo 4 vjet a me shume spastrohet dhe mbushet me militant partie..me 4 klasa shkolle dhe pa asnje kredencial per postet qe mbajne.

Po faji dhe pergjegjsia gjithnje bien tek ne…populli…i cili nuk reagon aspak…as kur vjen koha per zgjedhje…ose reagimi mbetet nje reagim primitiv qe ja jep votat partive te ndryshme ne baze te lidhjeve “klanore” dhe aspak mbi meritat e atyre partive. Me quani cte doni por per mua ky eshte nje fenomen shuuuume me i thelle ne anen e PD-isve dhe mbetet pengimi me i madh drejt nje normalizimi te gjendjes politike. Populli voton sic eshte vetja e tij…dhe ne mbetemi me nje popull ne shumice injorant, te pa pare dhe klanor. Vota i duhet dhene ati qe e meriton…dhe populli po te ket aq pergjegjsi per voten e vet…ndryshimet vine shpejt.

Prandaj duhet dorheqja dhe zhdukja nga politika e Sali Berishes…eshte kushti numer 1 sepse nuk mund te shkohet me drejt demokraise dhe zhvillimit me kulte dhe klane mesjetare si te ati.

J. thotë:

4 Prill 2008 @ 7:03 pm

Blendi, o peshq, kur keni ndermend te ktheheni se ndyshe nuk behet ai vend?

ktheheMi. doje te thoshe…

Mua nuk me pelqen hic kjo menyre e peruljes, perthyerjes se dinjitetit ne menyren e te festuarit.
Kur erdhi Bushi njesoj…me vrap me i puth fotot. Tani me puth flamurin e NATO-s, ai tjetri te dicitura puthte bacen….vl…

Per shqiptaret dikush kishte thene kohe me pare:
- Ne tregun e sklleverve shqiptaret jane mall i padeshirueshem, nuk dine te perulen. Mbajne inat dhe rebelohen.

ose…
- Mos i afro afer pjates tende, as mos i bej te te perulen nese nuk ke menduar se pas kesaj duhet tu presesh koken.

po pyes: KU JANE KETA SHQIPTARE SOT????

lefti thotë:

4 Prill 2008 @ 7:07 pm

Ftesë për festë, apo ftesë për punë *

Marrja dje e ftesës per anëtarësimin ne NATO të vendit krijoi një klimë feste për këdo dhe anëekënd Shqipërisë. Skenat emocionuese nga samiti i Bukureshtit, ku drejtues të Shqipërisë shfaqeshin krah liderëve botërorë, për herë të parë si të barabartë, u ndoqën me kureshtje dh gëzim nga të gjithë. Edhe deklarimet politike, nga paraditja e deri në mbëmje, të ngjanin me një ditë feste, larg urrejtjes dhe gjuhës së përditëshme armiqësore.

Por sot ne mbrëmje, opozita ka vendosur të protestojë, nën moton “Pro NATO-s, jo Berishës” në qendër të Tiranës, duke kërkuar nga qytetarët që ta harrojnë festën. Vlen të shihet, se cili do të jetë reagimi i sotëm i opozitës, që dje u shfaq po aq e hareshme, sa edhe shumica, por më tepër qëndrimi i qytetarëve. Si për të testuar të majtët, kryetarja e kuvendit Topalli, i ka bërë sot një tjetër ftesë pë festë, por pas protestës, në orën 19.00. Këto dy zhvillime të pritshme do të shuajnë kuriozitetin e të gjithë atyre që e ndjekin politikën me vëmendje, nëse ftesa e djeshme për në NATO, ishte ftesë për festë, apo ftesë për punë dhe bashkënim të hapur mes forcave politike të vendit.

Gjuha e përdorur dje nga kreu i shtetit Topi, kryeministri Berisha, por edhe lideri i PS-së, Rama, të ben që të shpresosh për mirë, ndonëse politikë sonë nuk i zihet shumë besë, siç e ka dëshmuar tradita.

* Editorial Nga TAR (top-albania-radio)

Tironsi thotë:

4 Prill 2008 @ 7:09 pm

Grupo edhe une keshtu e mendoj zgjidhjen. Dhe per mendimin tim keshtu do vije, problemi eshte te koha. Per sa kohe do ndodhin keto ndryshime? Kam frike se duan shuuuume, shuuuuuume kohe. Me duket se ne qe kalojme me shume se 3 muj jashte shkeputemi pak nga realiteti i atjeshem dhe kerkojme shume. Ky o poplli jon o lla

Pjer Thomas thotë:

4 Prill 2008 @ 7:10 pm

Artikulli ishte i perkryer, pershkruante saktesisht shpirtin inferior dhe te çoroditur te popullit tone. Ne fakt jo vetem sistemi i socializmit shteteror, ka lene pasoja mbi psikollogjine dhe shpirtin e popullit tone , por dhe sundimi i gjate i perandorise osmane ka lene pasoja ne kete deformim te thelle te karakterit te shum shqiptarve.

….E vërteta është që në Shqipëri komandojnë të fortët dhe heshtin të mençurit, gëlojnë militantët, vuajnë individëd, korruptohen të rinjtë, kurvërohen të vjetrit….

Le te behet kjo shprehje e dites, megjithse te tera shprehjet jane te forta e te sakta. E lexova dy here artikullin.

Grupi thotë:

4 Prill 2008 @ 7:13 pm

Problemi me anarkizem Blendi nuk eshte se te etiketon sistemi apo dikush tjeter…problemi me anarkizem eshte se kerkon rifillimin nga zeroja. Shqiperia s’ka me kohe dhe nerva ta rifilloj perseri nga zeroja. Te kerkosh ti hqeim te gjithe dhe te gjithe politikanet kan faj etj etj…ndjenja qe jane shfaqur me shume kto ditet e Gerdecit…eshte te kerkosh rifillim nga zeroja. Ne Shqiperi mungojne institucione te forta…dhe me teper nje mirqenje ekonomike. So po te kishim mirqenjen ekonomike…s’do ti plaste njeriu per Berishen apo per Ramen apo dhe per Erion Velian.

Ky eshte problemi me idealizmin…po realiteti eshte qe asnjeri nuk e can koken shume per politken dhe Berishen dhe Ramen…e cajne koken per paret, miqenjen eknomike dhe sigurim ne sistem. Dhe kjo siguri nuk vjen me levizje dhe ndjenja femijnore…po te pakten ti japim nje forme besueshmerie ktyre institucioneve qe kemi…Se ne s’jemi ndryshe nga vendet fqinj…te pakten ti kopjojme ato qe ti afrohemi. Ndryshe…mbetemi si Serbia…me klane, me levizje femijnore dhe vetem “bombardimet” na fusin tru ne koke. Eshte shfuqizimi i politikes nepermjet rritjes se ekonomise, besueshmerise se institucioneve dhe meritokracise.

Si behen kto?? Nuk e di…po e di hapin e pare…Berisha IK!

Pastaj emra te tjere mund te permend po me hidhet Tokoja ne fyt dhe kush rri meret me te…

Blendi Salaj thotë:

4 Prill 2008 @ 7:20 pm

Per sqarim nuk po sugjeroj ANARKI. Kam thene qe Sistemi do te na etiketonte si anarkiste - dhe kjo do te ishte nje genjeshter. Eshte koha per te jetuar te Verteten, ketu gjendet dhe Alternativa. Tani na duhet nje “Manifest i se Vertetes”.

tung cuna, goca. Shpresoj t’ju kem folur.

Grupi thotë:

4 Prill 2008 @ 7:20 pm

Grupo edhe une keshtu e mendoj zgjidhjen. Dhe per mendimin tim keshtu do vije, problemi eshte te koha. Per sa kohe do ndodhin keto ndryshime? Kam frike se duan shuuuume, shuuuuuume kohe. Me duket se ne qe kalojme me shume se 3 muj jashte shkeputemi pak nga realiteti i atjeshem dhe kerkojme shume. Ky o poplli jon o lla

Patjeter qe do kohe…s’kam ansje iluzion se do behet neser dhe pasneser. Po te pakten te vijemi ne shina…Edhe popujt e tjere perreth nesh s’jan me mire se ne…edhe Shqiptaret e Kosoves s’jane me mire se ne…po u vune ne shinat e duhura nga “diksuh” tjeter. Edhe Greqia ka korrupsion dhe informalitet galopant…po kane mirqenjen ekonomike qe te mos e cajne koken aq sa ne.

Dhe e di qe ashtu mendon…edhe ti me cerape portokalli vishesh…

Etrusk thotë:

4 Prill 2008 @ 7:28 pm

Blendi mu duk sikur po lexoja veten time ne ate artikull.
Po alternativa cila do te ishte, zevendesimi me te shkolluar jashte shtetit qe jane idealiste? Sbesoj se mund te gjenden ose te pakten te mbeten deri ne fund. Ketu paraja dhe korrupsioni jane kryefjala e cdo teme, e para perdor te dyten dhe cdo pune eshte kryer.
Po ligji, shteti, rregulli, e verteta ku jane???
Do vijne me vone thone, njehere te pasurohemi keshtu pastaj do rregullohet, normal more se keshtu smund te mbetet gjithmone!!! Ja sa te bej nje dore lekesh une edhe me kesmet…
Rrofte Ambasada dhe shpresa per te ikur, pa per tu kthyer ishalla kur te behet me mrie, se qe do behet do behet se sben, po do haje i cik kohe…

gioi thotë:

4 Prill 2008 @ 7:34 pm

ne rradhe te pare desha te them se artukulli i mesiperm eshte thiesht opinion.Pastaj pash ne artikull se flitej per shumice popullsie,mbi cbaza flet ne emer te sumices.Pastaj edhe fakti i flamujve asht e vertet qe personat nuk i kane famujt e natos ne shtepi sic mund te kene ate shqiptar ,por mendoj se personi qe ka shkruar artikullin duhet te dije se ne raste te tilla ka organizator qe merren me kete pune.Megjithate jane fialet te kota keto qe po them,sepse artikulli asht nje opinon.

lulian kodra thotë:

4 Prill 2008 @ 7:35 pm

Ai robi or ti Blendo, kur tha “you can’t handle the truth”, donte te thoshte qe e verteta eshte e paprekshme, “unhandlable”, perndryshe e verteta eshte e dhunshme, ka te beje me shqisat, dhe kur shqisat te rrejne, kur je sonambul, apo ne delir, duhen nja dy shpulla te forta qe te te sjellin ne terezi. Ne qofte se do flasim per te verteten, dhe shfaqen e te vertetes, manifestin e te vertetes, atehere guri eshte i vertete, druri eshte i vertete, dhuna eshte e vertete, zjarri eshte i vertete, muri ku perplasim koken ne qofte se nuk zgjedhim t’ia perplasim koken atij qe na shtyp, eshte i vertete. Hej, ne doni qe ketyre gjerave te verteta si druri e guri e muri e dhuna t’ia vini emrin ANARKI, atehere anarkia eshte e vertete, dhe ne qofte se po flasim per nje detyrim moral ndaj te vertetes, atehere dhuna eshte ai detyrim moral.

Perndryshe, gezuar festen.