Mbi Peshkun
Çfarë është Peshku Pa Ujë?
Peshku pa ujë është një projekt i nisur në Dhjetor të vitit 2003. Fillimisht, u nis si një projekt anësor i revistës ezeta, por tashmë është kthyer në një nga faqet më serioze shqiptare në Internet.
Disa prej synimeve të kësaj faqeje janë:
- krijimi i një hapësire për zhvillimin e mendimit kritik dhe medias qytetare e të pavarur
- përmbledhja e ngjarjeve kryesore të kohës duke përfshirë materiale nga burime të ndryshme në një faqe të vetme
- krijimi i hapësires publike për komente, përgënjeshtrime dhe informacione të mëtejshme nga publiku i gjerë
- komentimi i lajmeve dhe shfaqja e gabimeve dhe influencave të interesave të ngushta të medias komerciale
Ky projekt mund të duket sikur shkel të drejtat e autorit. Në të vërtetë, duke krijuar lidhje me artikujt fillestarë, dhe duke referencuar cdo pjesë që marrim prej një burimi të caktuar, besojmë se respektojmë të drejtat e autorëve dhe gjithashtu ndikojmë në krijimin e një transparence përsa i përket medias shqiptare.
Peshku mirëmbahet nga:
Llukan Tako - Llukani është mbikëqyresi më aktiv i faqes, me një numër të përbindshëm artikujsh dhe komentesh. Ka një diplomë në financë dhe një diplomë pasuniversitare në drejtimin e ndërmarrjeve. Jeton në Tiranë dhe punon për Lëvizjen Mjaft.
Penar Musaraj - Penari e nisi Peshkun si një projekt anësor të revistës ezeta në Dhjetor ‘03, por ka kohë që i kanë rënë bateritë. Design-et dhe redesign-et e faqes janë produkte të tij. Ka mbaruar universitetin për politikë dhe antropologji, dhe tani është bashkë-partner i CMS Lounge, nje kompani për web design. Jeton në Montreal.
Blendi Salaj - Blendi, i diplomuar për median, punon full-time në gazetën Boston Globe (motër e vogël e New York Times), merret me Fotografi artistike dhe emisione radiofonike tek Radio Ezeta. Kohën për të shkruar tek Peshku ia vjedh gjumit. Jeton në Tiranë.
Gjithashtu, që nga versioni i ri, Peshku ka dhe një grup të ngushtë moderatorësh që kujdesen për komentet e faqes.
