Gazeta Shqip 

Cikuli: Do të hartojmë strategji për ta luftuar
Një pjesë e madhe e popullsisë shqiptare vuajnë nga Hepatiti B dhe C. Në bazë të statistikave zyrtare të Ministrisë së Shëndetësisë, 9 për qind e popullsisë vuajnë nga Hepatiti B dhe 1 për qind nga Hepatiti C. Gjatë një aktiviteti organizuar në kuadër të ditës ndërkombëtare të sensibilizimit për Hepatitin B dhe C, u prezantuan shifrat dhe u evidentua nevoja e hartimit të një strategjie kombëtare për luftën ndaj hepatiteve virale dhe faktorëve të tij.

Aktualisht, Shqipëria ka një prevalencë prej 9 për qind të prekurve me Hepatit B. Dy janë rrugët e parandalimit dhe uljes së numrit të të prekurve me të dy hepatitet, sipas profesor Bashkim Resulit. Kështu, ai përmend rritjen e sigurisë së përcaktimit dhe mënjanimit të përhapjes së Hepatit B dhe C në Bankën e Gjakut, nëpërmjet teknikave të ndjeshme dhe strategjia e donatorëve të gjakut pa pagesë. Ndonëse numri i të prekurve me Hepatit B është ulur në vite për shkak të faksimit në shifra të njëjta mbetet numri i të prekurve nga Hepatiti C, i cili është vdekjeprurës. Vetëm 3 muaj më parë, 80 fëmijë talasemikë u prekën nga virusi i tmerrshëm Hepatit C. Ky lloj hepatiti merret vetëm nëpërmjet kontaktit direkt me gjakun e infektuar, nënprodukteve të tij të politrabsfuzuar, talasemikët.

Duke folur për problemet e hepatiteve, ministri i Shëndetësisë, Maksim Cikuli, u shpreh se “përgjysmimi i të sëmurëve me Hepatit B u realizua nëpërmjet fillimit të vaksinimit, ndërsa trajtimi i Hepatitit C është më delikat, pasi nuk mund të parandalohet nëpërmjet vaksinimit”, u shpreh ministri. Për të prekurit nga Hepatiti C, ministri tha se do të rritet fondi për trajtimin mjekësor të tyre. “Kemi vënë në dispozicion 280 mijë dollarë amerikanë për të blerë interferon, i cili është një trajtim i shtrenjtë për kurimin e Hepatitit C, ku llogaritet 4800 dollarë për person”, u shpreh Cikuli.

Sipas tij, vaksinimi për Hepatitin B nuk do të ndërpritet, madje po nxitet tregu i hapur farmaceutik. Ndërkohë, Bashkim Resuli tha se “hepatitet përfaqësojnë sëmundjet infektive më të përhapura në botë, ku janë të infektuar nga Hepatiti B, 2 bilionë njerëz në botë, aktualisht të infektuar 350 milionë mbartës dhe 1 milion të infektuar këtë vit. Për Hepatitin C ka 170 milionë të infektuar në të gjithë botën dhe 20 mijë të infektuar çdo vit”. Sipas tij, në vitin 1991, kohë kur Organizata Botërore e Shëndetësisë iu drejtua vendeve të botës për të përfshirë vaksinimin kundër Hepatitit B në programet kombëtare imunizuese, vendi ynë ka pasur një prevalencë prej 18 për qind të Hepatit B, me të dhëna të përafërta me vendet e Azisë së largët.

Dita botërore e sensibilizimit për Hepatitin B dhe C synon sensibilizimin e njerëzve lidhur me rrugët e transmetimit të virusit dhe pasojat nga mosmbrojtja. Rrugët kryesore për tejçimin e virusit të Hepatit B merren nëpërmjet gjakut të infektuar e kontaktit seksual, ndërsa për virusin e Hepatitit C merren nëpërmjet kontaktit direkt me gjakun e infektuar, nënprodukteve të tij të politransfuzuar, talasemikët. Në aktivitetin e organizuar nga Ministria e Shëndetësisë morën pjesë përfaqësues të Organizatës Botërore të Shëndetësisë, mjekëve të Gastro- Hepatologëve, Shoqatës së Talasemikëve dhe Shoqatës së Hemofilikëve. Ata diskutuan mbi mënyrat e sensibilizimit për testimin dhe njohjen e Hepatitit B dhe C. Po kështu, u hodh edhe ideja e hartimit të një strategjie kombëtare, e parë si një nga mundësitë që jep ndihmesë në trajtimin e të sëmurëve me hepatite virale.
Transmetimi

I Hepatitit B merret nëpërmjet gjakut të infektuar e kontaktit seksual, ndërsa Hepatiti C merret përmes kontaktit direkt me gjakun
Vaksinimi

Kundër Hepatitit B, është masa më e mirë mbrojtëse, ndaj vaksinimi nuk do të ndërpritet, madje po nxitet tregu i hapur farmaceutik
Kurimi

I Hepatitit C bëhet përmes medikamenteve të kushtueshme, ndaj janë vënë në dispozicion 280 mijë dollarë për të blerë interferon
Shifrat

Në botë flasim për 1 milion të infektuar me Hepatit B në vit dhe për Hepatitin C raportohen rreth 20 mijë të infektuar çdo vit