Brezi im

Brezi im kulaç që s’erdhi kurrë
majà e lodhme,
vende vende rrëmbyer prej zjarrit
si femrën që do përgjysmë
një trim gangster djalë fshati,
Brezi im vajzë që s’erdhi kurrë,
garanci televizore, siguri bashkëshortore,
trishtim dysheku rrahur verës,
kopan dhe burr’ i çmeritur
rrahin pambuk gruaje,
pambuk gruaje, o llaftar i tështitur,
çorape që s’shkojnë me qëllim,
kërcinj të djegur mëhallash,
e film porn titulli me pëshpërimë
prej marlon brandoje nofullpërtuar,
e gjalpë që hyn në fletë bakllavaje dhe flegra ulkonje me fletë,
gjizë nga kjo tokë e lashtë,
gize dysheku me kashtë,
se “e ruaje atë yndyrë të paktë”, lëkura tharë, kolagjen i tradhtuar
tek radhë e bulmetit komplot tempullarësh,
s’kaa, s’kee, porta trojane dhe hungareze
me gurë, këmbëmatur saktë, me këmbë, me sistem englez,
Një sihariq që s’erdhi kurrë, një myzhde e ftohtë, brezi im
sekt adidas dhe camay,
flamuj të shëmtuar prej mureve të turpshëm që dot s’i mbuloi
si një shpatull fëmije nën xhamin me “plasë
interesante”,
korruptuar nga suvatë e lindjes dhe sevdatë qe s’ndodhnin më
pas orës’ folklorit me zysha shpjeguese decibelesh debile
që hanin edhe më suva të rà fitoresh
me hardhuckat rimuese nëpër mure
marsh i pandalshëm pellgjishtesh pellazge dhe gropash suvashë,
Brezi im me hekura të parrahur në dritare
ku rriheshin njerëz, vula nën sy dhe vendime të vjetra valiu,
Vajzë që s’erdhi kurrë,
organi i saj apo jorgani i tij
i harrimit shpinëkthyer? Brezi im
mosklithma njëzëri aty ku duhet, pambuku merr hakën
natën vonë,
një garzë ku gjaku murrmet ngadalë
mbërthyer me plumb paramande…