Turmat në mikrofon
Para dy muajsh (”Liria e turmokratëve”, “Shekulli”, 17 qershor 2007), pata tërhequr vëmendjen për një efekt të padëshirueshëm të të ashtuquajturit demokratizim të mediave ndaj ligjërimit publik shqiptar bashkëkohor: vandalizmin ndaj institucionit të fjalës së lirë. Hordhi anonimësh, të të gjitha skajeve, skutave dhe dialekteve, enden hazdisur nga forumi në forum, kryesisht në Internet, duke i trajtuar, praktikisht, si mure nevojtoresh publike. Graffiti-t e këtyre zhgarravitësve virtualë kanë domethënie jo në vetvete, por për të kuptuar se ç’mendësi është duke u selitur në turmat të cilat nesër do të votojnë, do të protestojnë, do të kërkojnë e do të kushtëzojnë politikat demokratike në Shqipëri, në Kosovë e në Maqedoni.
Balkanweb është një nga ato faqe Interneti, e cila u jep hapësirë komentimi të pamoderuar vizitorëve anonimë. Mirëpo çfarë diskutohet atje shpesh nuk ka të bëjë aq me kryetemat, sesa me çështje të identitetit; aq sa të duket sikur shqetësimi kryesor është të pajtojnë identitetin kombëtar ose etnik me identitetin fetar ose politik. Kjo nuk do të thotë se publiku shqiptar i mediave shqetësohet sot kryesisht për identitetin e vet; por vetëm se ajo pjesë e lexuesve dhe vizitorëve të kësaj faqe (dhe faqeve të tjera të ngjashme) që ndihet moralisht e detyruar të shprehet publikisht, po e bën këtë në regjistrin e identitetit. Kësisoj, çdo lloj debati i lënë në mëshirë të fatit do të rrëgjohet herët a vonë në përplasje arketipale mes të mirëve dhe të ligjve, ose gjyqe pompoze ku dënohen simbolikisht armiqtë tradicionalë të “shqiptarit” – që sipas rastit janë serbët, grekët, turqit ose të tre së bashku; por edhe e sidomos shqiptarët e tjerë, ata të fshatit tjetër, të nahijes tjetër, të dialektit tjetër, të fesë tjetër; ata që e mbajnë festen të përkulur majtas jo djathtas, ose mustaqet të përdredhura së larti jo së poshtmi; kryqat e synetlinjtë. Një nga temat e shumëdiskutuara të këtyre ditëve lidhej me lajmin për tre nxënëse të pezulluara në shkolla të mesme në Kosovë, për shkak se mbanin ferexhe – lajm i cili vetvetiu fton për kujdes e delikatesë ndaj ndjeshmërive fetare, sikurse fton për respekt të institucioneve qytetare. Megjithatë, diskutuesit në Balkanweb nuk vonuan ta përfshijnë në debatet e tyre metafizike, për raportet e fesë me identitetin shqiptar:
“Disa mbeturina te aziatikëve dhe sllave qe kan mbet ne Kosove dhe kan idologji te ish pushtusve po e shkatrrojn imazhin dhe aspiraten e shqiptarve per pamvarsi.”
“Ktyre mbeturinave turko-arabe-sllave na turpëruan kombin ku do që presentohen si shqiptare ‘muslimane’ ktyre të pa ftyrëve duhe tu ndalohet edhe dalja në rrugë.”
“…ajo vajzë duhet të largohet jo vetëm nga universiteti por nga e tërë Kosova. Në qoftë se i duhet ferexhje, le të shkojë në Afganistan.”
Në një kohë që pala tjetër kundërpërgjigjet:
“Çdo e keqe per ne shqipetaret, ka ardhur nga sllavo-ortodokset, serb, grek, bugar dhe rus. […] Mos harrojm se prifterinjet pedofil serbo-grek, i kan nxit masakrat dhe gjenocidin kundra shqiptarve, ne Kosove me vise dhe Çameri…”
“Ata qe shkruajn kunder fes Islame te shqiptaret, jan te nxitur nga sllavo-ortodokset serbo-grek, ngase si qellim keto anti njerz dhe anti shqiptar e kan tkurrjen edhe metej te gjeografis shqiptare dhe tendencave ne vazhdim te aneksimit te tokes shqiptare, nepermjet kolones se pest, te shqiptarve ortodoks, ateist dhe stalinisto-enverist.”
Edhe një lajm rutinë politikash partiake të kuadrit, si ai i dorëheqjes së Sabit Brokajt nga posti i kryetarit të grupit parlamentar të LSI, do të komentohet sipas së njëjtës optikë:
“Ai e ka emrin Sabit dhe vetkuptohet eshte emer shqiptar dhe nuk deshiron t’i kundervihet qeverise se sotme patriotike shqiptare qe udhehiqet nga patrioti Berisha per deshirat e ortodokseve socialiste-bizantine.”
Ndërsa lajmi për arrestimet e fundit të zyrtarëve të lartë të qeverisë Berisha me akuzën për korrupsion, dhe reagimet përkatëse të opozitës do të interpretohet si vijon:
“Si shpjegohet qe sa here qe Kosova ka probleme dhe kerkohet mbrojte dhe ndihme nga Shqiperia lindin probleme ne Shqiperi dhe keto probleme kane autore socialistet, si ne vitin 1997 kur Kosova sa kishte filluar luften me serbet socialistet bene grusht shteti dhe e shkaterruan Shqiperine, edhe tani kur Kosova ka nevoj te marri pavaresine dhe dipllomacia shqiptare kerkon me e perkrah socialistet kerkojne t’i presin koken shefit te dipllomacise Shqiptare zotit Basha. Kush eshte mbrapa socialisteve, kush i shtyn ato ose i financon ato? A mos valle jane serbet, se kryetari i partise socialiste eshte nje adhurues i serbeve dhe per kete ka shum fakte, kur ai i promovoje bizneset serbe ne mes te Tiranes.(!)”
Ky qenka foklori politik shqiptar bashkëkohor, i brezit të Internetit, ekonomisë së tregut dhe ‘integrimit’ shqiptar në Evropë! Ndokush edhe përsiat se këto shkëmbime anonimësh nxiten e manipulohen njëfarësoj nga agjentë provokatorë, ose njerëz të paguar a të shtyrë prej shërbimeve sekrete të huaja ose grupeve të ndryshme të interesave; por edhe në qoftë ashtu, kjo s’i cenon gjëkafshë konstatimit se mendja kolektive shqiptare nuk po çlirohet dot nga kurthet e tabuve dhe paragjykimeve, të cilat gjejnë truall të përshtatshëm në njerëz që ndoshta nuk kanë pasur kohë e mjete e mundësi ta përjetojnë dot shqiptarinë përtej kufijve tribalë të familjes, fisit e katundit ku u është hapur parashuta.
Pastaj, kur të qëllon të lexosh njërën palë që i drejtohet palës tjetër me këto fjalë:
“Ti je nga rraca perzierje e llymit nga tere Perandoria Osmane. Ti je nje i ardhur nga Hindukushi ose Turkmenistani. Paradhesit e tu kane ardhur bashke me ushtrite turke dhe pastaj kane mbetur ne Shqiperi. Pas 1912 u eshte dashur ta mesojne shqipen dhe te mbahen per shqiptare si shumica.”
ose përkatësisht:
“Shqiptare kujdes se çifuti Edi Rama ka per ta varrosur Shqiperine. Ai se bashku me nje grup bizantinesh po shkaterron Shqiperine dhe i ka vendosur shigjetat e intrigave kunder qeverise se tuaj te ndershme dhe dihet se ai eshte nje simpatizant i madh serb dhe mbrapa tij fshihen greket armiqte e shqiptareve.”
Nuk mund të mos dyshosh se farë të tilla të përçarjes në të vërtetë janë mbjellë në ligjërimin publik shqiptar nga një grusht guru-sh të vetëshpallur të kombëtarizmit ose të shqiptarizmit modern, të cilët praktikisht luajnë me instinktet e dishepujve. E paaftë për të krijuar të renë në politikë, turma e ruan të paprekur virtytin e amplifikimit të gjithçkaje skajore, patriarkale dhe konfrontative që i ofrohet nga idhujt e saj në mediat.
Periudha pas 1990-ës ka qenë tryezë debatesh të mëdha për identitetin kombëtar të shqiptarëve, në raport me dasitë fetare, të kaluarën politike dhe kufijtë truallsorë; në një kohë që Interneti ua përcolli këto debate, kapilarisht, të gjithë shqiptarëve anembanë. Në Shqipëri u rikthyen praktikat e kultit dhe vetëdija fetare, ndërsa në Kosovë e Maqedoni përkatësia fetare erdhi duke u perceptuar si tipar etnik konstitutiv, pavarësisht nga distancimet e elitave. Edhe diskutimet e përcjella më sipër dëshmojnë që shqiptarët ende e mbajnë identitetin e tyre etnik si parësor kundrejt identitetet e tjera; por vetëm nuk pajtohen dot mes tyre për elementet e përkufizimit. Kjo i referohet edhe nevojës instinktive për të arritur përkufizimin ekskluziv të “shqiptarit të vërtetë” ose ideal, mundësisht në ballafaqim me shqiptarin tjetër, “të gënjeshtërt”, ose shkaktar të të gjitha dramave, mangësive dhe dështimeve të Shqipërisë dhe të shqiptarëve sot.
Do të më thonë që ky teatër komik kombëtarizmi është thjesht rravgim, dhe se shumica e shqiptarëve nuk merren fare me politikë, as janë fanatikë fesh, por “shohin punën e tyre”; edhe pse ky farë argumenti të bën të shqetësohesh edhe më për motivet e vërteta të asaj pakice që, përkundrazi, politikës i qaset me zell të habitshëm. Do të më thonë edhe se këta që ligjërojnë kështu nuk përfaqësojnë shqiptarët, por vetëm pjesën më skajore, më radikale e më të zhurmshme të kombëtarizmit shqiptar; ose të rinj axhaminj të diasporës, që kujtojnë se mund të shprehen në publik vetëm duke përqafuar artificialisht pozicione të tilla tepër agresive e përçarëse; me fjalë të tjera, që kjo dukuri e vandalizmit të ligjërimit publik nuk është simptomë e ndonjë egërsie kushedi çfarë, por vetëm spektakël i saj; ose një ekzorcizim i shqiptarisë të përjetuar përndryshe si fyerje.
Vërtet mund të jetë kështu, sikurse është e vërtetë që në të njëjtat forume gjithnjë do të lexosh edhe ndërhyrje të urta dhe të arsyetuara të pashkovasianëve, të cilët me durim shpjegojnë se argumenti fetar nuk ka vend në debate të identitetit shqiptar. Por njëlloj është e vërtetë se shndërrimet e reformat në politikë e në institucionet, për mirë a për keq qofshin, nistohen shpesh nga pakica radikale, të cilat tezat e papërgjegjshme të ideologëve kombëtarë i adoptojnë e përdorin për të larë hesapet me njëra-tjetrën, siç e tregoi eksperienca jugosllave gjatë viteve 1990. Prandaj dukuria lyp vëmendje dhe vigjilencë, në qoftë se nuk duam që anonimët e sotëm t’i shohim nesër jo më në forume Interneti, por në forume ku të vendoset e ardhmja e Shqipërisë dhe e shqiptarëve.
Ardian Vehbiu
28-09-2007
Shekulli
28 Shtator 2007 @ 2:44 pm
Më bëhet qejfi që zëra të tillë alarmi ngrihen kunër monotonisë së zërave antikomunistë/serbë/grekë të drejtuara kundër gjithkujt dhe çfardolloj fenomeni të mundshëm që mund të ndodhë në viset shqipfolëse.
Ndërgjegja e personazheve si e autorit dhe mjaft të tjerëve që kanë aftësinë e gjakftohtësisë në analizat e tyre, shpresoj që të fillojë që të bëjë që, që të gjithë ne, të mos shikojmë se përse e tha, se si ishte veshur ose se ku e kishte mbushur makinën me benxinë tjetri, që ta shpallim armik, por të gjykojmë siç është për të gjykuar rreth problemeve, dhe nëse mundemi, të japim ndonjë propozim për ndonjë zgjidhje të mundëshme.
Dikur thoja:”Harrojmë”… që të shikojmë përpara, nëse s’mundemi që të harrojmë, të paktën, përveç ‘deklasimeve’ të japim dhe kontributin për diçka më të lartë se ‘gjetja e armiqve të popullit’.
28 Shtator 2007 @ 2:49 pm
O i nderuar Ardian! Po eshte pak si e tepert te quash TURRME kater debila qe shkruajne atje, e aq me shume te shkruash kaq shume fjale per ta.
28 Shtator 2007 @ 3:25 pm
Idete qe hajvaneve ne nje fare menyre t’u mbyllet goja jane ide me shume se raciste, edhe Hitleri d.v. do dridhej nga emocioni po ti degjonte. Po c’ke more Adrian? Po te bezdisen mos i lexo, sic bej une. Gjithsecili gjen forumin e vet sot (fale zotit) ku mund te shprehe lirshem dhuntite qe ka, te mira apo te keqia qofshin. Nese s’te pelqen keep writing te shekulli dhe mos harxho kohe dhe nerva duke i lexuar.
28 Shtator 2007 @ 4:18 pm
Nje pyetje kam… Keto turmat e kane “genuine” kete urrejtjen apo jane thjesht aktore?
28 Shtator 2007 @ 4:36 pm
Alb, e ç’rëndësi ka?
Mund të jenë edhe genuine, por nëse rezltati është vetëm ‘ulëritja’, rezltati nuk ndryshon.
Nëse mua më krijohet përshtypja se Vehbiu( të më falë autori se e marr thjesht si shëmbull) është grek ose serb, dy janë gjërat: o shkoj e ja numëroj në lule të ballit (dhe ç’do riferiment me mbiemrin tim është kazual), ose përpiqem që idesë së atij ‘tradhëtari’ ti vë përballë një argument po aq të fuqishëm sa i tiji ose një rrugëzgjidhje tjetër.
Vetëm me plumb ose me diskutime pa ulërima mund të zgjidhen problemet.
Nëse jemi aq të civilizuar dhe pabythë që të mund të përdorim plumbin… të përpiqemi që të përdorim fjalën po aq civilisht.
28 Shtator 2007 @ 4:54 pm
edrus, ky shkrimi i vehbiut te le shijen e “mbylljani gojen ketyre debileve” dhe kjo s’eshte normale nga shume kendveshtrime. E para cdo njeri ka te drejte te shprehe lirshem ate qe mendon aty ku moderatoret (ne kete rast balkanweb) ja lejojne, dhe per mendimin tim mire bejne qe e lejojne. E dyta, s’ka ndonje atribut te vecante Vehbiu qe te mund te gjykoje c’eshte e pranueshme dhe c’eshte e papranueshme per www. Dhe tjetra eshte qe qytetarine nga katunaria (ne kuptimin e sjelljes dhe jo te prejardhjes) e ndan nje oqean, kjo s’presupozon qe “katunaret” s’duhet te kene akses ne forume, blogje etj. etj. Selektimi behet nganjehere shume natyral si psh te peshku, vjen dikush, leshon brockulla, s’ja fershellen njeri, iken. Job done, s’ka nevoje per diktature kibernetike.
28 Shtator 2007 @ 4:55 pm
Edrus
Alb, e ç’rëndësi ka?
______
Ka rendesi te marrim vesh ne eshte e mirefillte, apo eshte pjese e rrumpallhanes apo mercenarizmit te neveritur shqiptaresk, e cila ka si per qellim edhe te lere nje pershtypje rremuje.
Sa per Ardian Vehbiun… une mezi e pes ketu… edhe pse i’a kom gjet “deren”
28 Shtator 2007 @ 5:02 pm
Swed, nuk eshte thjesht ceshtje “katundarie” sepse une dyshoj qe nje “katunar” te kete kaq shume informacion rreth vendeve te afganistanit… shiko si ia thote penes ky tipi ketu… Ti je nga rraca perzierje e llymit nga tere Perandoria Osmane. Ti je nje i ardhur nga Hindukushi ose Turkmenistani. Paradhesit e tu kane ardhur bashke me ushtrite turke dhe pastaj kane mbetur ne Shqiperi. Pas 1912 u eshte dashur ta mesojne shqipen dhe te mbahen per shqiptare si shumica.… bash me kujtojne disa
28 Shtator 2007 @ 5:09 pm
Ky eshte metropoli shqiptar ..
28 Shtator 2007 @ 5:12 pm
Alb, siç thashë dhe më sipër; ajo ndjenjë shfryrje mund të jetë dhe puro, e pastërt dhe gjithsesi nuk ndryshon asgjë.
P.s: Përsa i përket mercenarizimit, më duket shumë e dobët si ide, sepse me atë fanatizëm që na shtjellon kur diskutojmë disa lloj muhabetesh, politika nuk ka nevojë që të shpenzojë për ‘partizanë’.
28 Shtator 2007 @ 5:30 pm
Prandaj dukuria lyp vëmendje dhe vigjilencë, në qoftë se nuk duam që anonimët e sotëm t’i shohim nesër jo më në forume Interneti, por në forume ku të vendoset e ardhmja e Shqipërisë dhe e shqiptarëve.
……………………………………………………………………………………
Syrin pushke,kunder mendimit te anonimeve..!
…por nuk kuptojme se anonimati,eshte thjesht nje mendim ne ajer qe nese amplifikohet me shpifjen ngelet anonim dhe i paperfillshem per rrezik,sic mendon Vebiu,
por ne se amplifikohet me te vertetat dhe faktet,pra anonimi ,atehere duhet ta marim ne konsiderat,
Pra jo te gjithe anonimet jane te “rezikshem” o Vebi,seleksionimi i mendimeve dhe zgjedhja e tyre nuk i bejne keq askujt.,te gjithe dine te bejne c`fare eshte mire dhe c`fare jo ..direktivat, per mua jane kot ,sepse nuk i degjon njeri.,sepse opinioni mbetet opinion ,eshte personal per kedo .
28 Shtator 2007 @ 6:10 pm
Nga qe e kam zakon qe po e fillova nje shkrim a nje liber per ta lexuar nuk e le dot pa mbaruar, edhe sikur te jete i papelqyeshem, arrita ta mbaroja edhe shkrimin e mesiperm te Ardianit.
Qe ne rreshtat e pare mendova se do ishte ose Fatos Nano ose Ardian Vehbiu. Kete te fundit e kam njohur vetem nepermjet shkrimit te “Lakuriqit te Sarandes” ku nepermjet kembengulje prometeane perpiqej te argumentonte se xhveshja ne plazhin publik ishte e arsyeshme.
Dua te them se nepermjet frazes nanoiste te mbushura me terma shume pak te ndryshme nga njera tjetra ne kuptim dhe me sofizma shpesh here te trasha ky fillozof fosil (ne dukje ne moshe shume te re) pa lengun e pjekurise fillozofike, perpqiqet te sjelle ne fokusin e mendimit publik te gjitihe thashethemnajen dhe tymnajen qe sjell rrokullisja e llahtarshme e shoqerise shqiptare me te gjitha vlerat e veta pozitive. Imagjinata me thote se kur e dogjen Zhana d’Ark apo Brunon me siguri qe era e keqe, shurra, dhe te pegera te tjera do tu kene shpetuar. Askush nuk shkroi per kete ere apo te pegerat e tyre nen djegjen e zjarrit te turmes mesjetare dhe sunduese te asaj kohe. Ardiani, eshte me mire qe gjitha ate njohuri qe ka transplatuar ne koken e vet prej “filozofi”, ta veje ne sherbim te shuarje se zjarrit dhe ndalimit te rrokullisje shqiptare sesa te sjelle fenomene te sjella nje here dhe qe nuk i heq asnje presje qe jane zhgarravina ne murret e nevojtoreve. E konsideroj problem mendor qe kur futesh neper blog-e dhe shkruan me emrin e vet (si ne rastin e lakuriqit te Sarandes) kerkon qe te tjeret te rrine sus ose te thone vetem ate qe mendon ky fosil i Aristotelit vetem e vetem pse ka vene emrin e vertete. Vertet mund te te ftojne ne nje blog por ti e di mire se ne blog ka anonime dhe ata mund te thone ç’te duan. Persa i perket sjelljes se ketij artikulli ne peshk une mendoj se artikulli mund te çohej ne nje le ta quajme “balene” ku mund te kishte nje rreth me te ngushte filozofik e kulturor. Jo pse peshku eshte nje nivel i ulet, ne asnje menyre por me teper e kam (te me falin) se peshkataert duke qene te zene tete ore me p une apo edhe me overtime shume me te bukur do ta kishin te diskutonin dhe te kenaqeshin me rubairat e Papit sesa me bubullimat shterpe te nje Zeusi nanoist te fosilizuar qe ne moshe te re.
Nje pyetje e thjeshte qe ti Ardian Vehbiu kurre nuk do te kesh guzimin t’i pergjigjesh sepse mund te prishesh me shefat e tua qe te paguajne per apologjine e shkaterrimit qe bejne. Perse te duket ty Vehbiu kaq e kritikueshme qe shume shqiptare ne blogje ja vejne fajin serbit , grekut trukut bullgarit. dhe e fundit qe prape kurre nuk ke per t’ju pergjigjur: A e di te fillozof se cilat ishin demet qe i ka shkaktuar bullgari dhe greku Shqiperise seper ato te Serbit dhe te Grekut nuk flet dot.
Natyrisht qe do te justifikoheshe me ate qe fillozofi nukjep pergjigje pyetjeve qe dihen.
28 Shtator 2007 @ 6:22 pm
Ardiatik, je i papame! Vetem me inerci idotesh del ne perfundime qe autori eshte i blere dhe vec shkruan per te hap percarje. Heres tjeter mos u nis te lexosh per ti dal ne fund artikullit vetem e vetem ti mbushesh mendjen vetes per paragjykime e perfundime “kalova lumin te dhjefsha kalin”
28 Shtator 2007 @ 6:50 pm
O Adriatik,
E mora vesh qe perpiqesh ti lexosh shkrimet e dikujt nga fillimi ne fund por kam pershtypjen qe s’perpiqesh po aq fort ti kuptosh se ne ate shkrimin e Vehbiut mbi lakuriqsine ai shprehet tekstualisht:
…duhet që turistet bregdetare të Sarandës t’i mbajnë mbuluar hiret mahnitëse të gjoksit….
Tani nqs ti e shikon kete si mbrojtje te lakuriqsise, mua me zhvleftesohet ca (thene troc: SHUME) ajo qe shkruajte me siper…
28 Shtator 2007 @ 6:53 pm
Sa here qe e kam gjetur veten ne atmosfere te tille me duket se po marr pjese ne nje seance te Albanian Anonymous ku ideja e mikrofonit virtual sherben si terapi kolektive.
Ne ekzorcizmin e te keqes (serbe/greke/vetjake) dehja kalon nga nje ngushellim ne nje tjeter.
28 Shtator 2007 @ 7:45 pm
PA,
do ngelet gjithmone keshtu. Prandaj dhe artikulli rishkruhet. Per fat te keq.
28 Shtator 2007 @ 7:50 pm
Harrova te shtoja,
kjo atmosfere ketu nuk ja ul vleren autorit dhe shkrimit. Ne te kunderten, e verteton ate. Ky eshte eksperimenti qe verteton hipotezen. Te ngelet vetem ta shijosh ate. Nice week end!
28 Shtator 2007 @ 8:18 pm
Kete artikull sapo e lexova tek Shekulli ku lashe dhe nje koment i cili eshte ky ; “Vehbiu, nuk e ka keq , veç une do ta qetesoja ate duke i thene se faqe/site si ajo qe permendi pak veta duhet ta dine, une vete tani e mesova se ekziston nje faqe e tille. E dija qe ekziston nje gazete Ballkan por jo nje faqe ku shkruajne shqiptaret. Ne diaspore ekziston nje faqe ku vizitohet jo vetem nga emigrantet dhe shqipot brenda ne Shq. por dhe nga qeveria shqiptare dhe qeveri te ndryshme ne EU dhe perendim, apo qarqe te aferta me qeverite, dhe kjo faqe/sajt quhet; www.peshkupauje.com . Ky eshte forumi kryesor mbarkombetar shqiptar ne tere planetin.”
Kam pershtypjen se Vehbiu i shkrete apo Vehbi Filozofi siç e quaj une per respekt, eshte lodhur kot kesaj radhe. Faqe/site qe i lexojne/vizitojne 50 veta ne dite , nuk mund te krahasohen me faqe apo forume qe lexohen/vizitohen nga 1000 veta ne dite siç eshte ky forumi yne mbarshqiptar.
28 Shtator 2007 @ 8:40 pm
Pjero, per gjithe respektin qe kam per Peshkun ka pasur plot raste ku i njejti fenomen eshte shfaqur biles ku kane marr pjese dhe vete moderatoret… kjo vete per faktin qe peshku gezon nje popullaritet qe merr permasa te nje turme virtuale. I vetmi ndryshim eshte se ketu e gjen ne nje trajte me te amballazhuar por sofistikimi nuk fsheh dot thelbin e asaj qe thote Vehbiu.
As nuk cuditem kur po i njejti mentalitet shpaloset ne median e shkruar. Rasti i Velos para ca kohesh me vjen ne mend.
PA
28 Shtator 2007 @ 9:58 pm
Ne shqiptareve na karakterizon deshira per te qene ekstremiste, ne çfaredo qe diskutojme qofte kjo politike apo jete e perditshme. Duket sikur vete historia jone dhe pozita jone gjeografike teper unike na ka bere te endemi nga njeri skaj tek tjetri. Diskutimet e blogjeve nuk jane gje tjeter vetem nje dokumentim publik elektronik i bisedave qe zhvillohen neper shtepite tona. E pranoj qe ne jemi lodhur nga temat politike, dhe nuk diskutojme per çeshtje kombetare ose politike me aq patos sa diskutonim dikur neper mbremjet familjare ku gjysma e kusherinje ishin te pranishem, por dore nga ekstremizmi yne nuk kemi hequr dot kurre. Pse atehere habitet ky Ardiani qe kjo tani behet permes blogjeve?
Sa per idene se duhet t’u mbyllim gojen ketyre njerezve, vete pozicioni qe mban ky zoteri e hedh poshte tezen e tij. Argumenti rrezon vetveten! Une ndersa e lexova shkrimin nuk me erdhi ne mend gje tjeter veçse: ja edhe nje ekstremist tjeter shqiptar. Te me fali Ardiani apo çdo njeri tjeter qe mendon si ai, po me duket se nuk shpetojme dot nga vetvetja. Te mendosh se pa pritur e pa kujtuar shqiptaret do te pushojne se qeni ekstremiste, eshte po aq ekstremizem sa ekstremizmi qe po kritikohet nga shkrimi.
Shqiptareve u pelqen te shahen, te shamatohen, te diskutojne me ze te larte, te ngulin kembe ne opinionet e tyre, te mos bien dakort, prape te shahen e keshtu cikli vazhdon. Ardiani dhe askush tjeter nuk ka per ta ndryshuar dot kete realitet. Ndoshta koha, dhe pak qetesi e stabilitet, mund te na qetesojne dhe te na bejne dikur te mos kemi kaq shume etje per te kundershtuar njeri tjetrin per gjithshka. Deri sa kjo te ndodhe, njerezit duhen lene te lire te shprehin vetveten. Ne fund te fundit prandaj jemi shqiptare dhe jo gjermane.
28 Shtator 2007 @ 10:26 pm
Parrulla Armiqesore-s, duke ta njohur bojen e helmatisur ku shpesh ngjyen penen tende shish, nuk me vjen keq qe qe harxhoj pak sekonda ne pergjigje te vleresimit tend ndaj postimit tim.
E gjithe pergjigja eshte kjo. Provo ti Parrulla Armiqesore te na japesh nje permbledhje te shkurter lidhur me demet qe i sollen bullgaret dhe grekerit shqiptareve. Vehbiu ka harxhuar nje kohe per te shkruar artikullin, provo ti Parrulle Armiqesore ca sekonda te shkruash nje mikroanalize per nje rresht te Vehbiut.
Nuk me pelqen te te shaj intelektin, intuiten apo inercine intelektuale tenden dhe te askujt. Edhe keto sharje qe mi ben ti mua do ti pranoja po te ishte se do sillje pak argument lidhur me temen apo me mospelqimin e postimit tim qe te shkaktoi irritim deri atje sa te thuash “inerci idiote”. Ne se ti e konsideron vehten te zotin per bisede me argumenta urdhro, ja sheshi ja mejdani, ja dhe Sulo Kapedani. Ne se ti e konsideron vehten te zotin ne sharje dhe fyerje apo kundershtime pa argument atehere une ta dorzoj kupen e fitores dhe kokeulur largohem nga fushebeteja duke te shternguare doren burrerisht.
LlTako-s,
Mesa kuptoj me ke lexuar fillimin dhe fundin se vetem per ato dy gjera ke folur. Sa per korrektesi, po te them se fraza qe ke prure per te me kundershtuar mendimet ne postimin tim nuk egziston me sa di une ne artikullin e Vehbiut “saranda etj..”, ne se e ke bere per shaka, s’ka problem por ne se e ke ber per te realizuar nje deshire per te fyer tjetrin, do ta konsideroja nje shpifje dhe natyrisht qe nuk do te kisha me respektin e zakonshem si per antaret e nje blogu, me gjithese kam pershtypjen qe je nje nga moderatoret e ketij blogu.
“Se ç’i shtyn turistet, shqiptare ose të huaja, të zhvishen në ranishtet ende patriarkale të Shqipërisë, kjo vështirë të shpjegohet me një arsye të vetme:” dhe vazhdojne arsyet. A mendon LlTako se ranishtet e Shqiperise jane patriarkale? Patriarkale jane Pushteti qe nuk i ka hapur rruge plazheve nudo me rregullat e percaktuara. E drejta demokratike e njerit nuk do te thote te cenosh te drejten demoktatike te tjetrit.
Tjetra:
“Është normale që, teksa lakuriqësia në skenë të amfiteatrit të Butrintit të joshë turizmin kulturor, gjoksi i zbuluar i një vajze buzë detit të skandalizojë qytetarët përreth, madje edhe duke i eksituar ata seksualisht. Çka nuk është ende normale, ka të bëjë me vështirësinë e kulturës shqiptare për t’u mësuar me këtë diferencim leximesh e funksionesh që i jepen të njëjtit objekt – trupit lakuriq”.
Perse kur eshte normale qe gjoksi i zbuluar i nje vajze buze detit te skandalizoje qytetaret perreth, madje edhe duke i eskituar ata seskualisht, atehere pse quhen ranishtet shqiptare si patriarkale. Edhe po te jete perdorur me ironi cilesori “normale” autori nuk ka te drejte (ne se flasim per shkrime dhe postime logjike) te perdore disa kute per te matur plazhet dhe kulturen shqiptare. Ketu autori nuk i shpeton dot ksenobythlepirjes se politikaneve shqiptare vec ne kete rastin e filozofeve dhe shkrimtareve dote quhej ksenop.thleporje.
28 Shtator 2007 @ 10:53 pm
O Adriatik,
Nese s’e gjen dot ate fjaline qe citova, packa se ke qejf ti lexosh shkrimet nga fillimi ne fund, atehere perse ma shkon kohen dem???????????
28 Shtator 2007 @ 10:56 pm
Per shkrimin (se gabimisht, ne menyre vertete te gabuar) u mora me pergjigjen e Adriatikut;
Kush e percakton faqen e Balkanweb si nje faqe perfaqsuese te denje te te gjithe bashkesise Shqiptare ne internet? Cila faqe e pambikeqyrur eshte e afte te mbaje automatikisht te pacenuara vlerat e diskutimi te llogjikshem e brenda kufijve te arsyes? Pse valle faqja e New York Times (nqs do te kishte blog) po te lihej e lire nuk do te perfundonte ne te njejten menyre? Mos valle “bota” i shpreh pasionet e saj ne menyre me te kultura se ne?
Kam pershtypjen se kete rradhe eshte krijuar pershtypja e gabuar nga ndjekja e vetem nje zone te kufizuar (me gjithe respektin e duhur per qindra mijera veta qe lexojne cdo dite Balkanweb).
28 Shtator 2007 @ 10:57 pm
po une te thashe ne menyre te kulturuar ate qe ti ja fute kot dmth se ajo sentence nuk eshte fare ne shkrimin qe pretendon ti dhe pike.
28 Shtator 2007 @ 10:58 pm
Epo edhe une ate po te them ne menyre po aq te kulturuar, qe packa se ti i lexon shkrimet nga fillimi ne fund, ja fut kot sepse ajo fjali eshte aty
Shikoje edhe njehere shkrimin.
28 Shtator 2007 @ 11:02 pm
fitove, naten e mire!
28 Shtator 2007 @ 11:04 pm
“fitore” pa vlere
Naten e mire
28 Shtator 2007 @ 11:29 pm
Me qe nuk te kenaq “fitore” pa vlere, urdheroje nje fitore te plote dhe me vlera, veç je i lutur qe te mos i ndryshosh kuptimet e frazave se me te vertete me duket sikur jam futur ne nje bote pasqyrash mashtruese.
Vehbiu:
“Që publiku art-dashës i Francisco Goya-s të shijonte bukurinë e Majës lakuriqe, duhej që gruaja spanjolle të mbetej e veshur dhe ta ruante lakuriqësinë xhelozisht për në dhomë të gjumit; që aktoret greke të zhvishen sot në skenën e amfiteatrit në Butrint, duhet që turistet bregdetare të Sarandës t’i mbajnë mbuluar hiret mahnitëse të gjoksit.”
Ti:
“Tani nqs ti e shikon kete si mbrojtje te lakuriqsise, mua me zhvleftesohet ca (thene troc: SHUME) ajo qe shkruajte me siper…”
29 Shtator 2007 @ 4:31 am
Ky eshte “trade off”-i i internetit; s’ke c’ben, duhet pranuar ashtu si eshte. Sa here qellon qe ulemi, ja edhe ketu, ne te njejten sofer me lloj lloj zarbosh qe s’e kane per gje te te prishin gjithe kuvendin. Jo vetem me ekstreme politike apo ideologjike qe trajton Vehbiu, por me mungesen elementare te kultures se komunikimit - per mua mungesa me uluritese qe kane shqiptaret sot.
Vec s’duhet haruar edhe kahja tjeter: nje blog eshte nje blog. Pra eshte vend muhabeti. Ka medemek-blogje ku vetem nje numer i caktuar personash mund te hyjne. I ka bere frengu si mi do. Njerit po ja pati qejfi ta kete medemek-blogun si sallez ku mbahen kumtesa te pergatitura me kujdes e me “peer reviews”, mund te vere nje “karakoll” te hyrja e blogut. Ndal qafir, ku shkon, ku e ke fletehyrjen. S’ke? S’qenke nga “tanet”? Per leckash e perjashta. Ama duhet te mesohesh qe dhe muhabetin do ta besh me “laj-thaj” 5 veta.
Personalisht nuk i duroj dot “kaloresit e fytyrave te vrerosura” qe e marrin veten shume seriozisht dhe u duken qe blogjet e tyre, ose komentet e tyre, do shpetojne planetin nga hallet. Jane po aq te pakendshem sa edhe shkarrashkrujtesit e grafitive qe permend me te drejte autori.
Por eshte nje hall pa zgjidhje normale. Vehbiu ketu ankohet qe pse trendafii ka gjemba.
29 Shtator 2007 @ 4:52 am
Adriatik, shkrimi i Vehbiut nuk eshte shkrim per forumet e Internetit, sepse per forumet e Internetit nuk ia vlen te shkruhet akoma. Me duket, dhe me te drejte, Vehbiu merakoset per perçarjen brendashqiptare sipas linjave fetare. Per kete ia vlen te shkruhet. Forumi i anonimeve te Balkanweb sherben vetem si specimen, si kulture laboratorike, sepse atje pjesemarresit flasin pa dogane, nuk ka autocensure. Por identifikimi etnik nepermjet perjashtimit nuk eshte prodhim i Balkanweb as i forumeve te tjera. Po te lexosh postimet qe permenden ne artikull, e sheh qe anonimet e cituar i kane marre leksionet nga te tjere, koka te medha, qe shkruajne ne mediat kryesore. Prandaj perçarja e re mes shqiptareve nuk i ka rrenjet ne folklor, por frymezohet nga lart.
29 Shtator 2007 @ 4:01 pm
Vërtet kujtoni se fenomeni në Balkanweb është diçka e izoluar, ose produkt i katër-pesë provokatorëve?
Hidhini një sy këtij linku:
http://www.kohajone.com/komente.php?idm=5570
Janë rreth 200 komente; nuk i lexova të gjitha, por e piva një kupë verë (uthull) nga fuçia.
Cilësia e diskutimit te “Peshku” nuk hyn fare në këtë mes. Peshku është një klub i këndshëm për ata që e vizitojnë e që kalojnë kohën aty, por nuk i kundërshton dot radikalët shqiptarë vetëm duke ekzistuar.
Përkundrazi, forume të tilla si Balkanweb dhe të gazetës Koha Jonë të japin një ide se çfarë fantazmash enden në katakombet e mendjes shqiptare.
Interneti shqiptar është i molepsur me këto gjëra.
Tani është puna juaj nëse do t’i kushtoni ndonjë farë vëmendjeje kësaj murtaje, apo do të vazhdoni të admironi e të lëvdoni shoku-shokun.
30 Shtator 2007 @ 2:23 pm
Parrulla Armiqesore thotë:
Po te lexosh postimet qe permenden ne artikull, e sheh qe anonimet e cituar i kane marre leksionet nga te tjere, koka te medha, qe shkruajne ne mediat kryesore. Prandaj perçarja e re mes shqiptareve nuk i ka rrenjet ne folklor, por frymezohet nga lart.
__________
pikerisht kete kisha per qellim kur pyeta a jane “genuine” si qendrime apo thjesht merecenarizem.
2 Tetor 2007 @ 12:31 am
Per mua Vehbiu eshte jashtezakonisht i afte ta rrahe nje teme per vdekje, por ketu, pervec pershkrimit te situates, nuk jepet qarte as rendesia e problemit dhe as zgjidhja. Problemi per Vehbiun eshte i “te ashtuquajturi demokratizim te mediave ndaj ligjërimit publik shqiptar bashkëkohor: vandalizmin ndaj institucionit të fjalës së lirë. Hordhi anonimësh…” Demokratizimi qenka i ashtuquajtur - perse? Perdorimi i lirise se fjales eshte vandalizim - i c’gjeje? Anonimet qenkan hordhi ushtaresh pushtues - kjo frike nga anonimati te jete e sinqerte, te kete hequr vertete dore autori nga teorite e ‘vdekjes se autorit’?
I vetmi rrezik qe permendet ne artikull eshte i mpakjes se demokracise, kur turmat e ushqyera blogjeve “do të kërkojnë e do të kushtëzojnë politikat demokratike në Shqipëri, në Kosovë e në Maqedoni” ose ne rastin me ekstrem i nacionalizmit te stilit serb miloshevician - kjo nje frike krejt e pajustifikueshme, jo vetem ne Shqiperi po edhe ne Kosove. Rreziku qe shoh une eshte te qendrimet si i Vehbiut ne kete artikull, qe duan t’i dalin perpara kushtezimit te ardhem te demokracise me nje kushtezim te tanishem te demokracise ne fjale.
Ne fjalet e vete Vehbiut situata eshte krejt e natyrshme per kushtet historike:
“Periudha pas 1990-ës ka qenë tryezë debatesh të mëdha për identitetin kombëtar të shqiptarëve, në raport me dasitë fetare, të kaluarën politike dhe kufijtë truallsorë; në një kohë që Interneti ua përcolli këto debate, kapilarisht, të gjithë shqiptarëve anembanë. Në Shqipëri u rikthyen praktikat e kultit dhe vetëdija fetare, ndërsa në Kosovë e Maqedoni përkatësia fetare erdhi duke u perceptuar si tipar etnik konstitutiv…”
Nuk mund te shkojme mbrapsht ne nje identitet statik, te panegociueshem, edhe sikur kete identitet te perpiqet te na e servire akademia tashme e groposur e shkencave. Vehbiu thelle thelle eshte pro ketij negocimi, prandaj diskutimin mund ta kishte cuar me tej, te ndihma qe akademiket mund t’i japin debatit me te gjere kombetar, e jo te alarmohej per ekzistencen e ketij te fundit.