gazeta Shqip

Kryetarja e Kuvendit, Jozefina Topalli, ka marrë pjesë dje në një takim me studentë, nxënës, shoqata rinore, dhe anëtarë të Parlamentit Rinor. Në takim kanë qenë të ftuar edhe ministri i Brendshëm, Bujar Nishani, zëvendësministra dhe deputetë. Në fjalën përshëndetëse, Topalli ka vlerësuar dhe përgëzuar pjesëmarrjen e të rinjve, në proceset integruese. Duke i cilësuar si pjesë shumë e rëndësishme e këtyre proceseve, Topalli tha, “në fakt, sot, është një ditë e veçantë dhe unë do të dëshiroja që këtë takim ta konsideronim një festë të përbashkët për ngjarjen më të jashtëzakonshme që na ka bërë të lumtur, për marrjen e ftesës në NATO. Është hera e parë që Shqipëria projekton në mënyrë të sigurt të ardhmen, tha ajo, duke shtuar se marrja e ftesës në NATO do të thotë siguri më e madhe për vendin, do të thotë stabilitet më i madh për rajonin, do të thotë investime të huaja, rritje ekonomike. Por, njëherësh, do të thotë një axhendë e re reformash, e cila, do të fillojë për t‘u avancuar e progresuar më tej, që ditën e hënë, në Kuvend.