Gazeta Panorama

• Altin Goxhaj*

Vetëm dy ditë më parë, Bashkia Tiranë u ul në një tryezë me disa shoqata, duke vënë si kusht “transparence” për shkatërrimin bashkiak të Parkut të Liqenit Artificial mospjesëmarrjen në tryezë të aktivistëve kryesorë të Aleancës për Mbrojtjen e Hapësirave Publike në Tiranë. Ata që nuk u thirrën janë denoncuesit kryesorë të korrupsionit “Rama”, që nëpërmjet trukimit të konkurseve dhe jurive e ka kthyer konkurrimin në një spektakël të vërtetë mashtrimi dhe manipulimi!
Transparenca Rama e zhvilluar dy ditë më parë, kishte vetëm një kusht të vockël! Palët që të do të ftoheshin në transparencën bashkiake duhej të zgjidheshin me kompromis bashkiak. Vetë organizata që do të organizonte organizimin e transparencës, duhet të ishte e preferuar e Bashkisë. Por natyrisht që më e rëndësishmja për Ramën ishte që zërat e fortë të shoqërisë civile që denoncuan korrupsionin e konkurseve të trukuara të qendrës dhe periferisë së Tiranës duhet të mënjanoheshin!
Problemi ishte se si!
Prej 2 javësh u bënë lloj-lloj përpjekjesh që emrat e padëshiruar të hiqeshin nga axhenda. Pati 2 javë e-maile, debate, kërcënime, frikësime, përpjekje për komprometime, korruptime, dhe më së fundi kolona e pestë e shoqërisë civile ia doli mbanë!
Njësoj si konkurset bashkiake për qendrën dhe periferinë, edhe transparenca bashkiake njësoj funksionoi! Natyrisht që unë dhe ca të tjerë jo vetëm që nuk u ftuam, por edhe ata që morën pjesë u kërcënuan se në rast se unë dhe ca të tjerë do të merrnin pjesë, atëherë aktiviteti do të anulohej!
Kjo frikë nga e vërteta e denoncimit të korrupsionit, frikë nga e vërteta e fakteve, frikë nga shoqëria civile jashtë skemës Rama-Soros-Ambasada Holandeze është normale për palën e korruptuar!
Sepse ne, shoqatat denoncuese jemi jashtë skemave të korruptuara sorosiane, që gjatë këtyre 3 vjetëve shkatërruan 14 vjet shoqëri civile në Shqipëri, duke rrënuar të gjitha vlerat e krijuara në vite për ta kthyer shoqërinë civile në një shkretëtirë. Sepse vetëm kështu shoqatat e krijuara apo të serumuara nga SOROS të jenë i vetmi zë qytetar në Shqipëri. Në mënyrë që Rama kur të shkatërrojë dhe shkretojë, të mos ketë zëra kundër! Dhe kështu ka ndodhur! Dhe kështu ndodhi dhe të hënën!
Shoqata pranë Bashkisë EKOLËVIZJA organizoi gjoja transparencën bashkiake, siç na kishte bërë presion 1 javë rresht nëpër e-maile me 3 kushtet:
pa media,
pa persona që do të denonconin konkurset maskaradë
pa denoncim!
Transparencë tipike bashkiake! Nga ato që trukon Rama!
Dhe meqë shoqatat e rrjetit Rama-Soros-Ambasada Holandeze nuk na lejuan të denonconim trukimin e konkursit holandez ku u përfshi djali ish-drejtoreshës së “Soros” dhe menaxhere e fondeve te Ambasadës Holandeze për 4 vjet, për t’i dhënë Ramës kredibilitet në shkatërrimin e të vetmes njollë të gjelbër sinjifikative që i ka mbetur Tiranës, po i bëj 11 pyetjet të thjeshtuara publikisht në media që t’i shohin të gjithë:
A është e vërtetë se Rama ka pasur asistencë nga një subjekt holandez, i cili ka lidhje si me firmën 51N4E fituese të qendrës së Tiranës dhe firmën fituese holandeze MVRDV të Parkut të Liqenit për të ndërtuar Jurinë për konkursin e qendrës së Tiranës dhe të Parkut të Liqenit?
A është e vërtetë që dy anëtarë të dy jurive, miqtë e ngushtë Andreas Ruby dhe Xaveer de Geyter të jenë partnerë me firmën fituese 51N4E?
Ç’lidhje ka anëtari tjetër i jurisë, arkitekti kroat që punon prej 17 vjetësh në Amsterdam, Vedran Mimica me firmën fituese 51N4E?
A është e vërtetë që anëtari grek i dy Jurive Elia Zenghelis (që punon në Holandë) të jetë kontraktuar nga Bashkia Tiranë për t’i bërë një masterplan në Laprakë dhe të ketë marrë leje nga Bashkia Tiranë për disa pallate në Laprakë dhe Kinostudio në 2005?
A është e vërtetë që Marin Biçoku, anëtar i jurisë është edhe anëtar i KRRT-së dhe a përbën kjo konflikt interesi, pasi KRRT-ja gjykon projektet?
A është e vërtetë që dy anëtarët e jurisë së Liqenit, Marin Biçoku dhe Arben Biçoku, të jenë nga e njëjta familje dhe a është normale që dy shqiptarë nga e njëjta familje të marrin pjesë si anëtarë Jurie Ndërkombëtare?
A është e vërtetë që anëtari i Jurisë së Parkut të Liqenit, Johan Anrys, është staf i 51N4E?
A është e vërtetë që anëtarja e jurisë së Parkut të Liqenit, libanezja Roueida Ayache është një ndër arkitektët e zgjedhur nga Rama 3 vjet më parë për të bërë masterplanin e Tiranës?
Të gjithë këta emra të përfshirë në Jurinë e Qendrës dhe të Parkut, duke qenë të kontraktuar nga Bashkia apo firma fituese, d.m.th që kanë marrëdhënie financiare që varen nga Bashkia apo firma fituese, a janë të pavarur në vendimet që marrin?
Mbi cilin ligj dhe mbi çfarë kriteresh janë zgjedhur pikërisht këta njerëz, të cilët kanë varësi reciprociteti apo konflikte të pastra interesi?
Dhe pyetja më e rëndësishme: A është e vërtetë që firma belge 51N4E që fitoi konkursin e qendrës së Tiranës kishte si përfaqësues artistik (çfarë termi!) djalin e ish-drejtoreshës së “Soros” Tiranë, piktorin Anri Sala, një ndër miqtë më të afërt dhe më të vjetër të Edi Ramës?
*Aktivist i Aleancës për Mbrojtjen e Hapësirave Publike