Shekulli Blog

Me anë të një vendimi që ka marrë gjatë ditës së djeshme, qeveria ka vendosur që të gjitha donacionet për Gërdecin të kalojnë në arkën e buxhetit të shtetit. Pra, dhurimet e biznesit dhe qytetarëve, tashmë janë një zë taksash për të mbushur buxhetin e shtetit. Vendimi i marrë nga qeveria, që përcakton edhe burimet, bën të ditur se “dhurimet e derdhura në llogaritë bankare, të hapura për këtë qëllim, do të jenë në masën 150 000 000 (njëqind e pesëdhjetë milionë) lekë dhe nëse dhurimet rezultojnë mbi vlerën e mësipërme ato do të rimbursojnë Fondin e Kontigjencës. Pra, që nga dita e djeshme, Arka e Buxhetit të Shtetit ka filluar që të marrë disa miliona pasi, sipas llogarisë së bërë publike nga ana e Ministrisë së Financave për dhurimet, gjendja ka qenë 1,555,615 lek, 2 666 euro, 20 030 dollarë dhe 100 paund. Pra, që nga ky publikim duket se qeveria ka filluar të përdorë fondet e dhuruara, për të mbushur arkën e buxhetit të shtetit.
***
Pas tragjedisë së ndodhur në Gërdec, një pjesë e madhe e mediave dhe opinionit publik mbështeten dhurimet e fondeve në favor të kësaj tragjedie, por vendimi i djeshëm i qeverisë bën që destinacioni i këtyre fondeve të ndryshojë tërësisht. Kështu, të gjithë ata që do kontribuojnë, që tani e tutje, thjesht do paguajnë kontribut për buxhetin e shtetit dhe jo për viktimat e Gërdecit. Filozofia e kësaj situate është e thjeshtë: Nga njëra anë qytetarët e solidarizuar që po dhurojnë nga paratë e tyre për banorët e Gërdecit (edhe pse njëkohësisht paguajnë edhe taksat për të mbushur buxhetin e qeverisë), dhe nga ana tjetër, qeveria “Berisha” që ka bërë ndërmend të kompensojë buxhetin e saj, me paratë e dhuruara nga qytetarët.

Gjendja e llogarisë së dhurimit

LEK 8003890900 1,555,615
EUR 8000890900 2,666
USD 8002890900 20,030
GBP 8001890900 100

Box

Vendimi

MIRATIMIN E BURIMEVE DHE TË PROCEDURAVE TË FINANCIMIT TË DËMEVE PASURORE TË SHKAKTUARA NGA AKSIDENTI TEKNOLOGJIK I GËRDECIT

Në mbështetje të nenit 100, të Kushtetutës dhe të Ligjit Nr.9836, datë 26.11.2007, “Për Buxhetin e Shtetit të vitit 2008”, të ndryshuar, me propozimin e ministrit të Financave, Këshilli i Ministrave:

V E N D O S I:

1. Financimi i dëmeve pasurore, të shkaktuara nga aksidenti teknologjik i Gërdecit, bëhet në përputhje me listën dhe vlerën përkatëse, të miratuara në Vendimin Nr.336, datë 24.03.2008, të Këshillit të Ministrave, “Për miratimin e vlerës së dëmeve, të shkaktuara në objektet, pronë private, si rrjedhojë e aksidentit të ndodhur në Gërdec”.

2. Burimet e financimit të dëmeve pasurore, sipas vendimit të sipërpërmendur, në vlerën 1 572 milionë lekë, janë, si më poshtë vijon:

a) Dhurimet e derdhura në llogaritë bankare, të hapura për këtë qëllim, në masën 150 000 000 (njëqind e pesëdhjetë milionë) lekë;
b) Fondi Rezervë i Këshillit të Ministrave, në masën 800 000 000 (tetëqind milionë) lekë;
c) Fondi i Kontigjencës, në masën 622 000 000 (gjashtëqind e njëzet e dy milionë) lekë.

Dhurimet, nëse rezultojnë mbi vlerën e mësipërme, të rimbursojnë Fondin e Kontigjencës.

3. Financimi i dëmeve të përfituesve bëhet vetëm në llogaritë bankare, të hapura në emër të tyre, duke zbatuar procedurat e mëposhtme:

a) Njësitë e qeverisjes vendore, në mbështetje të listave të miratuara me Vendim të Këshillit të Ministrave, hartojnë listë-pagesat përkatëse.
b) Listë-pagesat përmbajnë: emrin, atësinë dhe mbiemrin e përfituesit, vlerën e dëmshpërblimit dhe referencat e llogarisë bankare.
c) Njësitë e qeverisjes vendore depozitojnë në Ministrinë e Financave listë-pagesat, zyrtarisht dhe në formë elektronike.
ç) Ministria e Financave, në mbështetje të listë-pagesave, të përmendura në shkronjën “b”, të pikës 3, të këtij vendimi, urdhëron kryerjen e pagesës nga llogaria e hapur për këtë qëllim në Bankën e Shqipërisë, drejtpërdrejt në llogarinë bankare të përfituesve.

4. Ngarkohet Ministria e Financave për zbatimin e këtij vendimi.

Ky vendim hyn në fuqi menjëherë

K R Y E M I N I S T R I

SALI BERISHA