Dritëhije të një investimi miliardësh

Ka kapital 10 miliardë USD. Mbështetet nga kandidati për senator i shtetit Konektikat, Pjerin Lumaj nga Shkodra dhe nga banka Forefront Capital.

Ka qënë një lajm që ka kaluar si pa u vënë re. Kryeministri shqiptar Sali Berisha ka pritur një grup amerikan dhe ka ndarë me të shprehjen e interesit për të ndërtuar projektin më të madh në Shqipëri në fushën e turizimit dhe argëtimit, të quajtur The Millennium Casino & Resort. 

Plot 2 milardë dollarë amerikanë! Kriza matanë krahëve, investim që duhet pasur zili dhe që vërtet tregon se, sikurse thuhet në njoftimin zyrtar të Këshillit të Ministrave “ky projekt është rezultat i klimës tërheqëse të biznesit në Shqipëri, i gjeografisë së saj dhe klimës shumë tërheqëse për turistët. Ai synon krijimin e një qendre të madhe turistike në Ballkan”.

Nuk do të kisha mundësi as unë ta kisha vënë re këtë lajm, që duhet thënë se është një lajm i mirë për çdo shqiptar. Investimet e huaja sot janë aq të domosdoshme. Dhe të mirëpritura. Lajmi i dhënë në uebin e KM, pas vetëm katër minutash (!) u pasqyrua me tekst e foto në adresën www.sivapartners.com. Në fillim pa burim informacioni dhe vetëm pak orë më pas si lajm i portalit BalkanWeb.  Por askund nuk na ka ndodhur të gjejmë një “shpejtësi”të tillë informacioni. Qoftë për mbarë!

Lajmet befasuese

Në njoftimin e vet, SIVA Partners Llc “korrigjon” se projekti në Shqipëri nuk është 2 miliardë USD sa thuhet në njoftimin e qeverisë sonë, por vetëm 1,5 miliardë USD. Nuk komentohet diferenca. Një klikim i thjeshtë në internet të mëson mjaft për këtë grup amerikan. Në të njëjtën javë me vizitën në Shqipëri, sidomos shtypi kosovar ishte tejet i mbushur me lajme për grupin sipërmarrës të krijuar në vitin 2010. Gazeta “Telegraf” shkruante me 11 janar se “SIVA Global investon në Kosovë mbi 3 miliardë dollarë”. Të njëjtën gjë, por me nota më të forta e theksonte për Shqipërinë gazetarja Mimoza Dajçi në gazetën “Tribuna Shqiptare”, nën titullin “SIVA Partners LLC do të ndërtojë në Shqipëri një Rezort Super Luksoze me vlerë $1.5 Miliard Dollarë”, edhe pse ky grup amerikan nuk kishte mbërritur akoma në zyrën e z. Berisha.

“Kosova Info” është shumë më e avancuar. Ajo e jep lajmin për Shqipërinë që në datën 6 janar 2012 (!?). “Kosova Info” shkruan se “Viti 2012 sjell raporte jozyrtare që grupi ekzekutiv i SIVA Partners LLC me bazë në New York dhe me zyra në Tiranë, Vlorë e Sarandë do te vije per te vizituar vendet e Ballkanit. SIVA Partners ka ne plan biznesin e vet qe te investoje miliarda dollare ne shume projekte ne Shqiperi, Kosove dhe vendet e tjera te rajonit”,- thotë kjo agjenci lajmesh në Kosovë. Më pas ajo pasqyron të njëjtin informacion të botuar më parë nga gazetarja Mimoza Dajçi .

Nuk mbaron me kaq. Të befason një tjetër lajm, këtë herë më i hershëm se sa takimi i z. Berisha me grupin amerikan. Njoftimi vjen nga Kosova dhe mban datën 5 janar 2012, ora 14.07. I shoqëruar me foton e biznesmenit të fuqishëm amerikan Donald Trump, lajmi me titullin “Investime në Shqipëri nga Donald Tramp -Projekte për turizmin, me vlerë rreth 2 miliardë dollarë” nënvizon se “…Kompania “Siva” fillimisht do të investojë në Shqipëri bashkë me Donald Tramp në një objekt madhështor për turizmin, i cili do ketë vlerën e rreth 2 miliardë dollarëve. Kjo kompani nga data 15 deri 21 janar 2012 (shenimi im) do jetë në Shqipëri ku takohen edhe me kryeministrin Berisha, më pas do të shkojë në Kosovë, Maqedoni e Mali të Zi. Në Kosovë “Siva Global” do të investojë mbi 3 miliardë dollarë në fusha të ndryshme, si: banka/financa, sigurime, energji, miniera etj. Lajmin e bëri të ditur për “Kosova Info”, njëri nga partnerët e “Siva Global”, Blerim Grainca, që sipas tij ata vijnë me iniciativë të tij. Gjatë qëndrimit në Kosovë përfaqësues të kësaj sipërmarrje gjigande do të mbajnë edhe konferencë për gazetarë.”

Disa pyetje e komente pas tyre

Cili është grupi amerikan që ka krijuar kaq shumë informacion për një takim në Shqipëri që nuk ishte kryer akoma? Pse në të gjitha mediat është emetuar thuajse i njëjti tekst? Cila është mbështetja që ka kjo kompani dhe kapitalet e saj? Cilët janë drejtuesit e saj dhe historia e tyre e biznesit? Ka edhe shumë pyetje e komente të tjera. Le të vijojmë duke thënë në vijim (në mungesë të informacionit të plotë zyrtar të qeverisë) se, mesa duket nga projekti e lajmëruar, bëhet fjalë për Projektin e Porto Vista Marina & Resort, që përfshin 350 ha bregdet në brigjet e Vlorës, është e vendosur në Lagunën e Nartës dhe shtrihet deri 4 km në këtë bregdet. Sipas burimeve të vetë kompanisë “master plani i projektit të SIVA Partners do të jetë në një gadishull të vogël të rrethuar nga deti Adriatik. Ky projekt do të ketë marinën më të madhe në Shqipëri e në rajon me 800 vende për jahte ose objekte të tjera lundruese. Epiqendra e resortit turistik do të jetë kazinoja dhe dy kulla 75 - katëshe me një arkitekturë moderne dhe madhështore e me një pamje fantastike të detit Adriatik si dhe të 3 fushave të golfit, dizenjuar nga projektues me famë botërore”. 

Një rast i ngjashëm pa paragjykuar

Në vitin 2007, Qeveria kishte ftuar gazetarët, në prani edhe të ambasadores amerikane të asaj kohe, në Hotel Sheraton për të promovuar një projekt të rëndësishëm. Kryeministri e vlerësoi projektin, ndërsa ambasadorja amerikane shtoi disa fjalë më shumë për miqësinë e shkëlqyer mes të dy vendeve. Biznesmeni shqiptaro-amerikan … prezantoi në detaje projektin.

M’u kujtua ky detaj sapo po shfletoja lajmet e fundit të SIVA, por edhe CV e aktorëve të saj, të atyre që ishin në Tiranë dhe të atyre që nuk kishin mundur të vinin në kryeqytetin e të gjithë shqiptarëve… Por edhe lajmi i 2007-ës. Ja ai:

Tiranë, 2 mars, 2007 - Kompania ASG Power SA njofton se ka marrë lejen për të aplikuar për ndërtimin e një kompleksi energjetik me gaz natyral të lengshëm në rajonin e Fierit.

Qeveria Shqiptare miratoi dje në rajonin e Fierit një zonë për ndërtimin e projekteve energjetike dhe në mënyrë specifike aprovoi tre sheshe ndërtimi me sipërfaqe 30, 60 dhe 120 hektarë secila.  

Sheshi i miratuar prej 120 hektarësh, i pranuar nga ASG Power SA, është i vetmi që ka të gjithë sipërfaqen e mjaftueshme për ndërtimin e projekteve të gjenerimit të energjisë me cikël të kombinuar. ASG Power SA pret të fillojë punimet e ndërtimit për këtë projekt në muajin gusht 2007 dhe t’i përfundojë ato në fund të vitit 2009… Investimi total për këtë projekt arrin në 2.3 miliard dollarë.  Këto të dhëna e bëjnë këtë investim projektin më të madh të realizuar deri më sot në Ballkan “ etj, etj

Në vend të mbylljes…

Nuk bëhet fjalë për ndonjë paralele të qëllimshme mes këtyre dy rasteve dhe dhjetra të tjerëve, për të cilat mund të flasim një herë tjetër më gjerë. Fjala është për seriozitetin e kompanive, konsorciumeve apo koorporatave që vijnë dhe kërkojnë të investojnë në Shqipëri dhe, për më tepër, që priten në takime të veçanta nga shefi i qeverisë. Një praktikë që është e rrallë në vende të tjera. A e ka informacionin e duhur shefi i ekzekutivit për grupet që prêt? A janë të konfirmuara informacionet që flasin për miliarda dollarë investime dhe që më pas zhduken si flluska saponi? (le të uronim që të mos ndodhte kështu me SIVA Partners!)

Gjithsesi CV e grupeve të tilla të biznesit duhet lexuar mirë. SIVA partners pretendon se ka bashkëpunim me një bankë të rëndësishme në SHBA. Ky grup amerikan pretendon, në prezantimin që i ka bërë projektit në kryeministri, se investon në shkallë ndërkombëtare. Partnerët që janë pjesë e këtij projekti pretendojnë se disponojnë kapitale të rëndësishme. Për t’u verifikuar  është edhe CV e aktorëve kryesorë të kompanisë. Ajo është krijuar në vitin 2010. President dhe CEO i saj është një shqiptar që ka mbaruar Universitetin e Tiranës në vitin 2007. Mbështetja politike (të themi kështu) në SHBA vjen nga një tjetër shqiptar, me origjinë nga Shkodra, Pjerin Lumaj, aktualisht kandidat për senator në SHBA, i arratisur nga Shqipëria në vitin 1985. Drejtori i Menaxhimit nuk figuron të jetë në cilësitë që pretendon, ndërsa nuk gjen lehtë informacion për Marcello Rodriguez – arkitekti kryesor i projektit dhe Antonio Marques – inxhinier i SIVA Partners. Ka edhe shumë dritëhije të tjera në këtë projekt, ndërkohë që duhet thënë se në asnjë nga informacionet zyrtare të saj nuk flitet për “për investime në Shqipëri në fushat e infrastrukturës, në rrugë, hekurudha, ku përfshihet edhe hekurudha Shqipëri – Kosovë, si dhe vepra të tjera si tunele, porte, në fushën e hidrokarbureve, përfshirë edhe privatizimin e Albpetrol, etj. ..si edhe ndërtimi i Tram-it të Tiranës”, - sikurse në njoftimin e Këshillit të Ministrave.

Bardhi Sejdarasi

Revista JAVA

_________

Shqiptarja.com: "Siva" me 2 punëtorë premton parajsën: Investojmë 2 mld $

TIRANE-  Një firmë e vogël në SHBA, ka prezantuar të shtunën në Tiranë një mega-projekt ndërtimor dhe turistik, për të cilin shifra shkon deri në 2 miliardë dollarë. Pas këtyre shifrave astronomike fshihen aksionerë që në SHBA kanë ndërmarrje me dy punëtorë dhe bilanc modest në shitje. Firma në fjalë është “SIVA Partners” që prezantoi të shtunën  në “Sheraton” një projekt gjigand për një resort turistik, ku, përveç fushave të golfit e porteve për jahte – tashmë të dëgjuara – deklaron se është e gatshme të ndërtojë edhe dy kulla binjake, me nga 75 kate secila. Projekti do të realizohej në grykëderdhjen e Vjosës, në 505 hektarë, në një zonë të mbrojtur nga laguna e Nartës dhe vlera e saj do të luhatej nga 1.5 deri në 2 miliardë dollarë. Në qendër të këtij projekti ndodhet një super-kazino. Me fjalë të tjera, investitorët nga Shtetet e Bashkuara të Amerikës pretendojnë të ndërtojnë një Atlantik Siti në brigjet e Adriatikut në kulmin e krizës globale, një qendër të turizmit elitar, që do të ofronte vend për anijet luksoze nga më të mëdhatë dhe kaq shumë vende për bixhozxhinjtë e botës, sa do të rivalizonte çdo port tjetër turistik në Mesdhe.

Më 20 janar 2012,  ky grup investitorësh u prit edhe në zyrën e kryeministrit Sali Berisha, ku kreu i qeverisë u shpreh i gatshëm të japë dritën jeshile për investime të tilla, aq më tepër që amerikanët synojnë edhe sektorë të tjerë.

Presidenti i Grupit "SIVA Partners", Simon Elyakim, i prezantoi më 20 janar kryeministrit Berisha projektin "The Millennium Casino & Resort", që konsistonte në ndërtimin e një resorti turistik me vila dhe hotele, fusha tenisi, golfi dhe kazino. Ky projekt, tha ai, është rezultat i klimës tërheqëse të biznesit në Shqipëri, i gjeografisë së saj dhe klimës shumë tërheqëse për turistët. Ai synon krijimin e një qendre të madhe turistike në Ballkan. Po kështu, ai prezantoi portofolin e interesave të grupit për investime në Shqipëri në fushat e infrastrukturës, në rrugë, hekurudha, ku përfshihet edhe hekurudha Shqipëri-Kosovë, si dhe vepra të tjera si tunele, porte, në fushën e hidrokarbureve, përfshirë edhe privatizimin e Albpetrolit, etj, si dhe realizimin e tramvajit në Tiranë. Si zakonisht, para propozimeve të tilla, Berisha është ngazëllyer, duke thënë se kanë bërë shumë mirë që kanë përzgjedhur Shqipërinë, pasi qeveria e tij ka bërë shumë për të krijuar një klimë të përshtatshme për investimet e huaja.

Aksionerët

Pas këtyre shifrave marramendëse fshihet një kompani - pak të thuash - modeste në tregun amerikan dhe botëror të të patundshmeve dhe investimeve, që mund të mburret deri tani vetëm me një hotel-vilë dykatësh në San Paolo të Brazilit. "Shtyllat" e këtij grupi të pretenduar janë dy shqiptarë: Valentin Gurraj (29 vjeç) dhe Gjergj Frangaj, rezidentë në SHBA. Ky i fundit është pronar i një kompanie punimesh mermeri, me dy punonjës dhe me 304 mijë dollarë shitje të deklaruara gjatë një viti, sipas të dhënave nga organet tatimore të Amerikës. Pavarësisht nga drejtuesit amerikanë, apo nga deklarimi se nuk kanë nevojë për financime nga bankat, pasi grupi zotëron një fond financiar të quajtur "Forefront Capital", kjo ndërmarrje është themeluar nga Gurraj më 2010-ën në SHBA dhe është regjistruar edhe në Qendrën shqiptare të Regjistrimit (QKR) si biznes në dhjetor 2011 me po këtë emër në Qendrën Kombëtare të Regjistrimit si një shoqëri me përgjegjësi të kufizuar (SHPK) e thjeshtë vetëm më 18 dhjetor të vitit të kaluar. Si objekt të saj ka deklaruar financimin, projektimin, ndërtimin, komisionimin, ndërmjetësimin, mirëmbajtjen, administrimin, menaxhimin, zhvillimin e projekteve ndërtimore dhe infrastruktore për qëllim civil, shitblerjen dhe dhënien me qira të pasurive të luajtshme dhe të paluajtshme. Valentin Gurraj, qytetar shqiptar, ish-gazetar, lindur në Shkodër 29 vjet më parë, e shpall veten pronar i vetëm i kompanisë me 100 mijë lekë të vjetra kapital. Përfaqësues ligjor i saj është Oltjan Hoxholli, jurist, që ka punuar në Bankën Kombëtare Tregtare më parë, si dhe në një studio ligjore private. Kompania ka përfaqësues të saj në vendin tonë edhe në qytetet e Vlorës dhe të Sarandës. 

Me këtë prtofol ajo duhet të ketë bërë përpjekje të jashtëzakonshme për të dalë në skenë kaq shpejt dhe për të bindur investitorë tepër dyshues në këtë situatë botërore të ekonomisë që të hedhin para në Shqipëri.

Megjithatë, në vitin 2009 shumëkush mund të kujtojë një reklamë shumë të përsëritur në TV se shitje tokë shtetërore në Pishë-Poro të Vlorës. Por, a mjafton blerja e saj që të marrësh OK nga kryeministri për kulla binjake më 75 kate? Ndërkohë, nuk ka asnjë vendim nga KRRTRSH për dhënie të lejes për këtë projekt.