Toyboy

Në Irlandë, para pak ditësh, shpërtheu skandali seksual për një histori dashurie mes gruas së Kryeministrit të vendit dhe një djaloshi 19-vjeçar. Ja pse lidhjet kur ai është shumë më i ri se ajo në moshë vazhdojnë të shkaktojnë ende shumë polemika.

Të dashuruarit e kujtojnë gjithmonë takimin e tyre të parë dhe për Iris Robinson ai moment do të ngelet i paharrueshëm: kishte hyrë në dyqanin e mishit, te kasapi i saj i besuar, në Ballyhackamore, në një lagje të Belfastit, kur vuri re një djalosh të vogël me përparëse, që mbi një karrocë shtynte disa copa mishi më të mëdha se vetja.

Pyeti se kush ishte dhe kasapi iu përgjigj: “Është Kirk, djali im. Ka ardhur koha që të më ndihmojë”. Djali ishte në klasën e katërt fillore. Zonja Robinson, në atë kohë rreth 50 vjeç, mund të ishte gjyshja e tij. Ndoshta nuk e kishte imagjinuar kurrë, që një dhjetëvjeçar, më vonë, djali i kasapit, do të bëhej i dashuri saj ose ndryshe “toy boy”, siç përdoret sot. Kështu, sa hap e mbyll sytë zonja Robinson, e pa veten në mes të një skandali seksual që shumë shpejt bëri xhiron e botës. Nuk ishte vetëm për diferencën e madhe të moshës, (ajo 59 vjeç ai 19), që tërhoqi vëmendjen, por historia e tyre e shkurtër e dashurisë bëri bujë edhe sepse Iris, është Zonja e Parë e Irlandës së Veriut, gruaja e Kryeministrit që drejton qeverinë autonome të këtij vendi, dhe deputete në radhët e Partisë Protestante, lider i së cilës është bashkëshorti i saj.

Por nëse vazhdojmë të marrim parasysh se pasi u zbulua dhe pranoi lidhjen jashtëmartesore, ajo tentoi vetëvrasjen dhe se përveç seksit, në lojë janë edhe 50 mijë sterlina që gruaja i kishte marrë borxh nga dy ndërtues për t’ia dhënë të dashurit të ri që të blinte një bar (kur mbaroi historia e tyre kërkoi që ai t’ia kthente paratë), besojmë se ka material të mjaftueshëm për të zënë faqet e para të gazetave e edicioneve informative nga Londra në Nju Jork. Peter Robinson, burri i saj Kryeministër, thotë se e ka falur tradhtinë e së shoqes, por ndërkaq ka nisur hetimi për të verifikuar mashtrimet e mundshme.

Katolikët e Irlandës së Veriut kërkojnë dorëheqjen e Kryeministrit, ndërsa partia ku bëjnë pjesë të dy bashkëshortët e ka përjashtuar zonjën Robinson, edhe pse nuk dihet ende, nëse e ka bërë për arsye morale apo për shkak të dyshimeve të lidhura me korrupsionin. Paqja e brishtë në Irlandën e Veriut është në rrezik, thonë të shqetësuar komentatorët politikë. Megjithatë, gazetarët e mediave gossip, duket se janë në ditët e tyre më të mira. Ndërkaq, sociologë dhe seksologë, e marrin ngjarjen e ndodhur në Belfast si provë të një zakoni që po ndryshon dhe po prek sfera gjithmonë e më të gjera. Një psikoanaliste kanadeze, Valerie Gibson, ka shkruar për këtë “traditë” të re edhe një libër me titullin ”Një guidë për gratë e moshuara që dalin me djem të rinj”.

Por cilat janë këto lloj grash? “Janë gra shumë tërheqëse, seksuale, të sofistikuara, plot energji, gra që dinë si ta mbajnë veten në formë, që kanë sukses në punë apo që janë të pavarura ekonomikisht. Me pak fjalë gra, që kontrollojnë plotësisht jetën e tyre dhe nuk dinë çfarë të bëjnë me burrat e moshës së tyre”, përgjigjet autorja. Sigurisht që gratë të vetme nuk do të krijonin asnjë tendencë, nëse nuk do të ishin edhe meshkujt e rinj ata që do të binin pre e kësaj loje. Por djemtë e rinj, janë gjithmonë e më të shumtë në numër. Tani ka dalë jashtë mode mashkulli me thinja dhe moshë të pjekur, të rinjtë krijojnë më shumë tendencë. “Gratë janë bërë më të ngjashme me burrat”, ta pret shkurt Amy Kean, eksperte në lidhjet seksuale. “Bëjnë atë çka duan, ose të paktën e provojnë, ashtu siç kanë bërë gjithmonë meshkujt dhe nuk duan të kthehen në rolet pasive që kanë pasur më parë”.

Kështu, nëse gjithmonë ka pasur meshkuj që kishin dëshirë të dilnin me një toy-girl shumë më të re se vetja në moshë, ka ardhur edhe koha e grave me një “toy-boy” në krah. Cilat do qofshin motivimet, mund të themi se është bërë një fenomen që po përhapet me shpejtësi shumë të madhe. Mjafton të fusësh fjalën toy boy në Google për të gjetur një numër të pafundmë sajtesh angleze apo në gjuhë të tjera që flasin për lidhje të tilla me një diferencë jashtëzakonisht të madhe moshe. Për shembull në toyboy.com dashuria rinohet çdo ditë, apo toybywarehouse.com, mund të lësh takime dashurie mes grave të moshuara, por tërheqëse dhe meshkujve të rinj në moshë. Motori i kërkimit në internet të çon edhe në sajte që flasin edhe për barazinë mes sekseve apo ato ku mund të gjesh shpirtin tënd binjak, pavarësisht diferencave. Kjo sepse dashuria është e verbër. Me pak fjalë, zonja Robinson nuk mund të zgjidhte një moment më të mirë për të treguar takimin e saj me djalin e vogël 19-vjeçar të kasapit. Ky po që ishte një skandal i vërtetë për burrin e saj Kryeministër.

Por në klubin e grave të tilla qëndrojnë në krye pa dyshim Demi Moore dhe Madonna, por nuk mungojnë aty as biznesmenet, sipërmarrëset, mjeket, mësueset, asistentet sociale që tregojnë dëshirën e tyre për të pasur në krah një toy-boy. Në faqet për shpirtrat binjakë në internet lexon lloj-lloj historish. Vërtet që Zonja e Parë e Belfastit nuk është e vetme. Sipas sociologëve, ka shumë mundësi, që të jemi në fillim të një lëvizjeje që do të përmbysë çdo parashikim: mjafton të shohësh lajmet e raportuara nëpër gazetat londineze të javës së kaluar ku Allegra Mostyn Owen, 45 vjeçe, ish-gruaja e kryetarit aktual të Bashkisë së Londrës, Boris Jonhson, u martua sipas traditave myslimane me një djalë 23 vjeç. Por ajo që tërhoqi më shumë vëmendjen ishte fakti se gruaja ishte e gatshme të pranonte edhe poligaminë, d.m.th të pranonte që ai të kishte gra të tjera duke qenë se vetë nuk mund të bënte fëmijë.

Për ata që mund t’u bëhet një fiksim patologjik, ekziston një term, parafili, për të saktësuar njerëzit që kërkojnë raporte seksuale me njerëz me moshë shumë të ndryshme nga ajo e tyre (shumë më të rinj, apo më të vjetër, konsiderohet një formë perversiteti). Një herë e një kohë në botën perëndimore, zbatohej një ligj, edhe pse i pashkruar: “Mos dil kurrë me dikë që është më i vogël se gjysma e moshës tënde plus shtatë”. Por burrat e kanë kundërshtuar gjithmonë me dëshirën e madhe për të shkuar pas vajzave të vogla dhe tani duket se edhe gratë po bëjnë të njëjtën gjë. Është një lloj joshjeje që Dustin Hofman e kishte kuptuar që në vitin e largët 1967 teksa në film admironte Anne Bancroft që bënte reklamën e çorapeve. Mos u shqetëso zonja Robinson, je tamam në modë.