Kodi, 9 deputetë në grevë urie

Acarohet situata politike. Të vegjlit i ankohen Presidentit për dy partitë e mëdha. Lëshojnë ultimatumin: Do ngujohemi në Kuvend

Revoltohen të gjitha partitë e vogla, të cilat japin një ultimatum se do të hynë në grevë urie nëse nuk merren parasysh kërkesat e tyre. Dje paradite, ato kanë zhvilluar një takim me kreun e shtetit, Bamir Topi. Në takimin me Presidentin e Republikës, partitë e vogla, të majta dhe të djathta, kanë kërcënuar se do të futen në grevë urie në sallën e Kuvendit nëse dy partitë e mëdha, PD-ja dhe PS-ja, miratojnë Kodin Zgjedhor pa marrë parasysh propozimet e tyre.

Ky qëndrim i është bërë i ditur kreut të shtetit dje në mesditë, në një takim që ai zhvilloi në ambientet e Vilës nr.4. Ilir Meta, Dashamir Shehi, Nard Ndoka, Spartak Ngjela, dhe Petro Koçi kanë informuar Presidentin e Republikës në lidhje me lojën politikë që po bëjnë dy partitë e mëdha, duke miratuar një Kod Zgjedhor pa marrë parasysh pretendimet dhe sugjerimet e partive të vogla. Nga burime pranë takimit, bëhet e ditur se Presidenti Topi ka dëgjuar dhe mirëpritur shqetësimin e krerëve të partive politike, duke theksuar se atë e tyre do t‘ua bëjë të ditur edhe trupit diplomatik në vend.

Greva e urisë pritet të zhvillohet në sallën e Kuvendit, për të ndaluar PD-në dhe PS-në që të miratojnë një Kod Zgjedhor që favorizon dy partitë e mëdha dhe shkatërron partitë e vogla. Ato kundërshtojnë me forcë formulën e KQZ-së dhe kërkojnë që të rishikohet përbërja e komisioneve zgjedhore. Qëndrimi i partive politike është bërë i ditur publikisht edhe nëpërmjet një letre. Aty thuhet se për to është shqetësuese ndryshimi i Kushtetutës më 21 prill 2008, i hartuar dhe miratuar me shpejtësi nga dy partitë politike, PS dhe PD, të cilat shtrembëruan sensin e demokracisë dhe konstitucionalizmit në Shqipëri, duke reduktuar kontrollin parlamentar mbi qeverinë dhe duke shfuqizuar Komisionin Qendror të Zgjedhjeve, si subjekt kushtetues. Ato ndryshuan formën e cilësuar të zgjedhjes së Presidentit të Republikës dhe fuqizuan pushtetin e Kryeministrit, për të dominuar mbi pushtetet e tjera. Në letër thuhet se Komisioni për Reformën Zgjedhore, në frymën e dhunshme të ndryshimeve kushtetuese, paraqiti variantin përfundimtar të Kodit Zgjedhor, i cili përjashton hapur nga administrimi i procesit zgjedhor të gjitha forcat dhe faktorët politikë që kanë qenë kundër ndryshimeve kushtetuese dhe janë aktualisht e vetmja opozitë kundër marrëveshjes së Partisë Socialiste me Partinë Demokratike, për zgjedhjet e ardhshme parlamentare. Në letrën drejtuar Presidentit, partitë e vogla shprehen se "çështja që po ngremë është një nga më të rëndësishmet për demokracinë shqiptare. Askush nuk mund të paragjykojë zgjedhjet në funksion të pushtetit individual. Dhe pikërisht për këtë, në Kodin Zgjedhor që po kundërshtojmë, PS-PD janë munduar që të paracaktojnë rezultatin e zgjedhjeve, duke e paraqitur si formë demokratike". Kjo, sipas tyre, bëhet në nenin 12 dhe 14 të projektit, i cili flet për KQZ-në dhe që e bën këtë strukturë të kontrollueshme vetëm nga PS-PD. Në nenin 28, që flet për përbërjen e komisioneve të zonave të administrimit zgjedhor, kjo strukturë kontrollohet vetëm nga PS-PD. Në nenin 35, që flet për komisionet e qendrave të votimit, i bën këto përsëri plotësisht të dominueshme dhe të kontrollueshme vetëm nga aleanca PS-PD.

Më tej në letër thuhet se, partitë politike janë të sigurta që në rast se zgjedhjet në Shqipëri do administrohen vetëm nga PS-PD, atëherë shanset për zgjedhje të lira dhe të ndershme në Shqipëri kanë vdekur përgjithmonë. Mbledhja Reforma, miratohet formula e KQZ-së, kundërshton LSI-ja Pretendimi i LSI-së për reformën zgjedhore ka rënë në vesh të shurdhër. Kjo, pasi në mbledhjen e djeshme të Komisionit të Reformës, mazhoranca dhe opozita kanë miratuar me konsensus të plotë pjesën më të madhe të amendamenteve të draftit për Kodin Zgjedhore dhe bashkë me to, edhe skemën e funksionimit të KQZ-së, e cila do të përbëhet nga shtatë anëtarë. Në mbledhjen e djeshme të Komisionit të Reformës, sërish nuk kanë munguar debatet midis anëtarëve të komisionit dhe përfaqësuesve të LSI-së. Pas mbledhjes, e cila zgjati për gati një orë e gjysmë, bashkëkryetari i këtij komisioni, Fatmir Xhafa, u shpreh se "u vendos përfundimisht që formula e përbërjes së KQZ-së të jetë me shtatë anëtarë, nga nëntë anëtarë që ka qenë deri më tani, ashtu siç ishte përcaktuar edhe në draftin e ekspertëve".